Ndangira aho bashyinguye.

Umuvugo: Ndangira aho bashyinguye.

Rwanda rwambyaye
Ngusabye ibisobanuro
naba ngusonze
Naba nkugoye nkugondoje
5.Naba ngukuruye ngo ngukomeretse.

Mbe Rwanda mubyeyi
ibyawe birandenga
ikiniga kikaba cyose,
ishavu rikangundira,
10.induru inkangundagura!

 Rwanda rwambyaye
ndarana n'ishavu
kandi agatsinda rirara imbere,
 gusa kunda ngusabe
 usohoke urebe
15.narize nahogoye!

Benewacu akanunu ni mu gicuku
 bashize bose
gusa sinzi aho bashyinguye!
Nashatse hose nahebye
20.nuwabishe simuzi

ngo mubaze nyabuna
ahari umuzi
wabampaye ubuzima.
Ko bagiye ndi igitambambuga
25.none abo nabyaye

bashaka kubasura
 bakabaha icyubahiro
 none icyago gikomeye
nuko ntazi n'akanunu kaho bashyinguye
30.Ngo njye mpirirwa ahari nakwizihirwa.

Nyabuneka muntu
Wowe uzi iwacu
Nkura mu gicuku
Ndokora nanone
35.Ndangira aho bashyinguye.

Ndangira aho masenge ashyinguye
Mushyire ishyaka
Muheshe icyubahiro
Maze buri cyunamo
40.Njye musanga musure

Numva ko mama
Yishwe urubozo
Aririmbirwa ibihozo
Bamutemesha umuhoro
45.Bakamuca buri gice cy'umubiri

Bakamushyingura mu mashyiga
Agashya ubwa mushikake!
Ariko uwandusha inkuru y'iwacu
Yansura tukaganira
50.Akandangira aho mama ashyinguye

Nkamwishyirira indabo
Nkamwihera indamukanyo.
Ariko Rwanda
Niki cyo kanyagwa
55.Cyateye Abatangana

Ngo bateme intungane?
Iyo nkuru irantungura
Ikanshengura nkagaragurika!!
Benimana babaye Benimihoro
60.Intayoberana zivamo interahamwe

Zitoteza abatagatifu.
Ariko se koko Rwanda
Nzakore iki
Ko ijoro n'umunsi
65.Nsurwa naya masura yabo

Nkumva neza nsaze?
Ndabaririza uzi kubara inkuru
Ngo ankize iyi nkiranya
Ambwire n'akanunu
70.K'imibiri y'abiwacu.

Nyabuna nshuti y'Imana
Niba ari nawe wabishe
Iyi nduru mpora ndamukana
Ntigukora n'ahantu
75.Ngo nibura wikore

Uzinduke unyarukane
Ahari izo nzirakarengane?
Koko se Ruremabintu
Neza nzatabaruke ntanabatashyeho
80.Kuri irya nturo batihitiyemo?

Koko Mana ubu nabona ijuru
Ubuse naryinjizamo iri shavu?
Ko rinshishimura ngashira
Ngasa nutagira rutangira?
85.Ese mu ijuru

Haba amarira?
Ko umunsi natashye ntabasuye
Ahari bitazasibangana!!!
Ngaho nawe Mana
90.Ndangira aho bashyinguye

Mbahe icyubahiro
Dore nararokotse.
Ndangira aho bashyinguye
Nzaherekezanye n'urungano
95.Mbaganirire iby'iwacu

Imbere y'abacu.
Mbese Micomyiza
Nagize gicumuro ki?
Cyatumye abo tuvukana
100.Babavusha amaraso

Agasomwa n'imisega
Agatemba nk'isoko.?
Ese Rugira byose
Ubu koko abanjye baba
105.Bakiri mu bigunda nakira iyo ntimba?

Ese baratembanywe n'imigezi
Cyangwa inzuzi
Aho inzozi zanjye
Zazaba impamo
110.Nkamenya aho bashyinguye?

Ese bacumuye iki?
Cyatumye amagara yabo
Yandagara ku mugaragaro
Ba Mukundwa bagahandwa
Bagahererekanwa bagasambanwa umugenda
115.Nkabatarigeze umugisha?

Bajya kubahemba
Bakabitura kubahamba
Iyo mu binamba
Bagatembanwa n'itumba
120.Tukabura iyo batashye!!!!!

None n'ubu twarashobewe.
Ndangira aho bashyinguye
Mbasange mbasubize icyubahiro
Mbakereze umukiro
125.Bongere bambone,

mbataramiye iyo batuye.
Ariko koko Benimama
Bakubiswe impiri woshye impigi?
Bahigwa bukware!!!
130.Ese bucura wacu

Yacucumwe busimba
Asekurwa busombe?!!!
Ariko Mana mbega intimba
Mbega amateka ngo arambera urujijo!
135.Ese koko bagire gupfa

Ngire kuba imfubyi
None ngize no kubura
Aho bashyinguye
Ngo uko mbakumbuye
140.Nkenyere nkomeze

Mbasure twibasanire.
Nyabuneka ndakwinginze
Niba wibuka iby'iwacu
Ndema agatima
145.Nkura mu gatereranzamba

Undangire aho bashyinguye
Kuko byanze
Kudashyingura iwacu
Byangize nk'ishusho
150.Ndi igishushungwe

Isi yaranshoboye!
Yaransikamiye yarangundiriye
Ndatekereza agatambwe
Ngasa nusomye ku gatabi
155.Ngata umutwe.

Ndangira aho bashyinguye
Naho wangeza ku mva
Nakira ngakina
Nakunda ngakomera
160.Nashyira nkiyuburura nkiyubaka.

Disi byose
Dore ndabirora nkibyabaye ejo
Agapira papa yari yambaye
Agakanzu ka Kamariza
165.N'ijipo ya Jolie

Bindara mu nzozi
Nazengurutse amaguriro
Ngo mpagure utwiza nk'utwanyu
Gusa nahebye
170.Hehe n'akanunu.
.
Iyo nibutse bariyeri
Ndwara isereri
Nakwibuka zanyagwa z'indangamuntu
Nako indangamututsi
175.Bigakomera ndeba.

Izo nyagwa z'indangamuntu
Izo ziba indangahantu
Ngo zindangire indaro
Za benewacu basogoswe inkota
Mu mitima myiza
180.Itari yarigeze ikibi!

Iyo nibutse ko bambwira
Ko nsa na sogokuru
Ngaseka nka masenge
Nkagenda nka data
185.Nkavuga nka vumiriya

Mbura rutangira
Ngahogora simpore
Nibutse ko ntazi aho bashyinguye
Aho yenda
190.Abagashize babagenda hejuru.

Wowe uzi iby'iwacu
Banguka unkomeze
Undangire umugezi
Bajugunywemo nywumenye
195.Njye mbataramira

Cyangwa undangire agasozi
Kabisasiye bose
Njye ngenda mpakore isuku
Wenda nasubira ngaseka
200.Ndangira aho bashyinguye.

Rwanda mubyeyi
Uzabambarize bose uzagira impuhwe
Azambwire akanunu k'iwacu
Azaba ambyaye
205.Ubugira kabiri

Aho yenda nakongera
Nkagira akabiri
Ngakira iki kibi
Cyambayeho nk'ikibibi!.
210.Burya zirya nzibutso

Ni nk'impetso
Ziratujishe turakomeye
Si umurimbo ntihari n'imiringa
Hari imibiri y'abacu
215.Nicyo gituma mwumva

Mbaza umuhisi n'umugenzi
Inkuru y'iwacu!
Nicyo gituma rwose
Ndangisha aho bashyinguye
Ngo nzabashyire ishyaka
220.Twongere gushyikirana.

Hobe wowe
Utazi aho bari
Ngo ujye ubasura murire munaririmbe
Komera komera
225.Nimenya nzakurangira aho bashyinguye.

Umusizi Tuyisenge Olivier
Tel:+250787277631

Mwicuze Mwaracumuye

Umuvugo: Mwicuze Mwaracumuye.

Naciriwe incuro
Nkiri incuke
Ncunaguzwa ncumbitse
Nicwa nicaye
5.kubwanyu mutanyumvise.

Umunsi mutangira
Ibyo nise ubusenzi
Iyi si nari ntarayisesekaraho
Nkisuganya ntegereje ibise
10.ngo nsohoke nsige

Mama wari kumbyara
Byaje kwanga
Aracurikwa aracunaguzwa
Aratukwa aratotezwa
15.azira ubututsi atihaye

Mwicuze mwaracumuye
Ko mwangize incike
Nceceke mbimire?
Cyangwa nce bugufi mbicire?
20.byose ndanze mwicuze mwaracumuye.

Ko nshimye bari inyenzi
Inyambo bari mwebwe?
Ndamukanye induru
Ngo mpamagare impuruza
25.mwicuze mwaracumuye.

Muti  <<umututsi
Ntatore agatushe
Ashengurwe n’ishavu
Hige abahutu
30.biturize batimaze

Naho abatutsi bazerere
Inyuma y’imirizo
Y’inka zabo
Borore dusarure
35.Nibavunike baza ntibavunyishije

Mureke twikoranye dukore
Dutsembe abanzi
Batazana inzangano
Bakatwicira umuco
40.barya ni ibicucu

Mwige imbunda
Tuzumve impundu zayo
Twivuna umwanzi
45.Maze twiturire muri paradizo>>.

Ayo mahomvu yose
Yarumviwe rwose
Inyokotutsi iratsembwa
Umuntu agambanira uwamugabiye
50.yica uwamucumbikiye.

Ko nshimye bari inyenzi
Wowe wabishe wari iki?
Nabona izuba
Naba njye
55.Nta murambo wishwe n’inyenzi nzi!!

Si nabita intare
Birya nayo byayitera intinyi
Kwica busenzi
Urimo agusekera
60.agusaba gusabana

Kwica ucucuma mu isekuru
Ko byari umuco
Se byo ni ubumuntu?
Ukubita ku nkuta
65.abatakuvuze ibitambambuga

Mwicuze mwaracumuye
Igihugu mwaragitemye
Nkabatifuza ko gishibuka
Mushaka ngo gikongoke
70.mwigumanire ubutunzi?

Bwahe bwo kajya!!
Uko nyuze
Kuri nyabarongo iriya
Inyibutsa inyikirizo
75.Yariho cyagihe!!!!

Utagira icyaha
Useka amasaro agaseseka
Uberewe n’ubusugi
Ukabumusahura busimba
80.ukamuhemba mbona

Ukamuroha muri nyabarongo
Ukamugabiza ingona
Zigatura imibi
Inkongoro nazo
85.Ukazibera shebuja ,ukazishumbusha abadushimishaga.

Mwicuze mwaracumuye
Mwicuze mushize amanga
Birya uretse no kuba rwose
Bitari iby’I Rwanda
90.ntanahandi mbizi

Sinabaca icyiru
Cyabirya byaha
Sinakibona habe namba
Mwicuze mwaracumuye
95.mutakambire rugira

Kwibuka si inzika
Ni inzira nziza
Yo kunzahura aho narinziritse
Mu gahiri n’agahinda
100.mu marira n’amaganya

Kwibagirwa byo
Byaba ari ubupfapffa
Bupfunditseho ubupfu
Naba mfuye mfutse
105.naba mfobeje abanjye

Mwicuze mwaracumuye.
Naho abahakana
Barya barigiza nkana
Kereka niba babona
110.iyi ntimba narayitoraguye

Muri mata 1994
Amaraso yatembye ino
Rugira yasuhukiye I mahanga
None dore yaragarutse
115.abihishe mwigaragaze

Mwicuze mwaracumuye.
Rwa Rwanda rwanjye rwo hambere
Rwaremye inkongi muri njye
Rwancumuyeho bidaciriritse namba
120. rutuma mbaho nk’imbohe

Igihe kirageze
Ngo mwicuze mwaracumuye
Twunge ubumwe twembi
Twambare ubunyarwanda
125.inyangarwanda zari zaranyaze

Ingengabitekerezo ya genoside
Kiriya cyorezo gifatwe by’iherezo
Gishyirwe mu buroko burundu
Tuve mu bukode bw’ubukungu
130.twubake u Rwanda

Reka nsubike iyi nganzo
Sinayigera ku musozo
Gusa abatimaje baticuje
Mugane ibikwiye
135.mwicuze mwaracumuye

Iyi miturirwa
Iyi itatse kwa Gihanga
N’imbaraga za bene kanyarwanda
Batahirije umugozi umwe
140.bisuzumye bakisungana.

 Mwe muri iyo
Igihe ni ryari?
Ngo mwicuze ko mwacumuye?
Ngo mutakambire abo mwatoteje
145.Muturane nta mahane?

 Iwacu isango ni isange
Reka nsayuke
Nta nda nini ino twigeze
Ngo yenda tumire imbabazi
150.ducane ibyazimye.

Kwibuka niyo njishi
Ijishe Ubunyarwanda
Niyo nkindi nambitswe
Nkerewe nababara
155.Mwicuze mwaracumuye.

UMUSIZI TUYISENGE OLIVIER

Ikiganiro Umuringa( Umukirigitananga Niyifasha Esther)

Ikiganiro Ibigabiro( Inkomoko y'u Rwanda)

Narushye Uwa Kavuna.

Umuvugo: Narushye uwa Kavuna

Cyo ngwino umvure

Cyangwa umvushe

Nubundi narushye

Uwa Kavuna.

5.Umunsi wanze kunsibanganamo

N’umunsi uva inaha

Nkagutwaza umusaraba

Nkakurenza amataba,

Nabaye ibandi ndimenya

10.Bene nyoko banyica numva

Narushye uwa Kavuna.

Umunsi ugenda

Nabaye imbobo

Mbura imbamutima

15.Ntemana n’abaturanyi

Narushye uwa kavuna.

Ba bakobwa wadusiganye

Babaye indaya kubw’indamu

Njye ndi indindagire

20.Amaguru yabo

Arantunga nkaramuka

icyoroshye cyabo

kimpesha icyubahiro

nkarya kabiri

25.Narushye uwa Kavuna.

Ubu nsa nk’akavurivundi

Ndi mu itsinda ry’amabandi

Igikundi ndimo

Baragihisha uruhindu

30.Narushye uwa kavuna

Ba masenge wasize

Ni ibisambo

N’amasura masa

Bandiye umutima

35.Nsigariye ku mano

Naho ba marume

Bandaza mu rume

Ndira mpogora

Barangambanira ngo bangabize

40.Ibisare by’ibisimba

Ngo ihiii ntibashaka

Icyohe cy’ikigande

Icyana cy’igihutu

Aho iwabo !!

45.Barahashaka imfura

Z’imbavu ndende

Zirya nk ‘izabyigeze

Ureke ibihutu bibyigera

Narushye uwa Kavuna

50.Mumvure cyangwa mumvushe.

Ba bakobwa wadusiganye

Barabasohoye bo barabasibye

Ngo ni ay’ubusa

Nta n’uteze kubasaba

55.Nuwasara ntiyabarengereza igare

Amashuri yo murayanganya

Amazuru yabo mabi

Yabimishije ubutoni

Bene wanyu

60.Babatoza gukuka

Naho guseruka

Hazaseruka imfura zikibyiruka

Ese mawe

Ko unduta wazandangiye

65.Uwazanye ubwo bunyagwa

Bw’ubwoko

Ngo mutsinde iyo?

Narushye uwa kavuna

Umunsi nkurenzaho itaka

70.Ibyago nabiburiye umupaka

 Hambere aha

Sogokuru yasutse umusururu

Nsomyeho ahindura isura

Igicuma acyirenza urugo

75.Ngo hato amaraso yanjye

Ativanga naye

Akitwa umuhutu!!!

Umunsi nguherekeza ndira

Nanubu ndacyahogora

80.Niburiye isano

Nabaye igicibwa

Ndahungabana ntazicyo nzira

Iyo ngeze ahakabaye kwa Data

Bahuruza imihana

85.Hafi kuva imyuna

Ngo baze barebe ruharwa

Urwana rwo mu batutsi

Rw’ubuzuru bw’ubuzingo

N’ubutoki burebure

90.Nk’ubutagira icyo bukora

Bakantuka ibibi byose

Nasaba isano

Ngasanga nd’igisimba

Nti ni gashyire nzira

95.Gatahe nako gatumuke

Sekuru yafungishije se

None bagatumye nk’ingenza

Narushye uwa Kavuna.

Mama umunsi ugenda

100.Numvise nakujya inyuma

Iwanyu banyita ibandi ry’umuhutu

Kwa data bakanyita

Urwana rwo mu batindi b’abatutsi

Navuze iwacu

105.Mbura n’iwanyu

Narushye uwa kavuna

Ubu bene mama

Ni amabandi

Ni indaya butwi

110.Indaya zitagira ubwoba,

Yewe zitagira n’ubwoko.

Wambwira aho uri

Mubyeyi nakwisurira

Ngasuka amarira

115.Nterwa naza ndirimbo mbi,

Ndirimbirwa urwunge.

Nabonye byose byanze

Nibera ku muhanda

Nubwo uhanda

120.Ibisigazwa n’imisigi

Bisumba amasosi

Asize incyuro

N’imigati itatse imitongero.

Bene mama

125.Bakadandaza amagara

Nanjye ingagari

Nziba amagana.

Mama mubyeyi

Ntumaho roho

130.Yawe indinde indengere,

Benewanyu barandeba

Barampiga ngo bampitane

Kuko iyo bandeba

Inzigo irazuka

135.Bakanyitiranya n’ikishi bakanyishisha.

Narushye uwa kavuna

Mwindenganya gaa!

Sinjye wishe!!

Hishe data

140.Sinanjye wasambanye ahatariho

Hasambanye mama!!

Ibyo byose ndazira ibyiki?

Ibyo mupfa muzabipfane

Njye singira ubwoko

145.Nabuze kivura,

Mbura kivugira

Mbona gishengura.

Uyu mutima uyu ntunze

Untota gupfa nkavaho

150.Kuko ntacyo maze!

Ndazira indeshyo

N’imbavu mbungana!!

Uwazikuramo zikamvamo

Numva ari ibikunda

155.Urupfu narutumira tukituranira

Tugasangira umusigi

Nabona twasabanye

Nkarusaba kuncyura

Nkava inaha

160.nkajya ahari amahoro ahinda.

Ayo madayimoni bavuga

Bazayanteje nkaba nk’igishushungwe

Ko ahari bakwishima

Ayo marozi babeshya

165.Abahe ko atangeraho?

Ngo nyagure nyasome

Njye nirirwa ku gasozi

Nambaye ubusa

Ibinyita bisimbuka

170.Ko ahari bene ubwoko

Ubwonko bwawe

Bwakuzura ibyishimo!!

Niburiye ubwoko

Nabaye nyakamwe koko

175.Igihugu cyuzuye bene wacu?

Nabaye incike

Mbura nuwancira incuro

ngo nuko hamwe

Ndi icyana cy’igihutu

180.Ahandi ndi icyana cy’igitutsi?

Uyu mutima utera

Wankundira ugahagarika gutera

Gitera akanshakira

Ahandi ho gutura

185.Hataba ihohotera?

Ese mama?

Umbyara warabyishimiye

Ese wambyariye icyenda?

Hoya nako ni arindwi

190.Ahari nicyo gituma

Bantera imirwi!!!?

Ese ujya kumbyara

Ubu wabitinzeho

Sinkurenganya nibyakuguyeho?

195.Ese uziko umunsi utabaruka

Wasize utambwiye data ?

None uwo bantungiye agatoki

Ni ikigabo kihaye

Ndakireba nkabona kitambyara

200.Rwose barakibeshyera

Ese nawe wari warubatse ku moko?

Mbihindure nkwite umugenzi

Nzavugeko navutse ukwanjye

Nka Merikisedeki wa mwami?

205.Wavutse nta se nta Nyina?

Ese mama ujya kumbyara

Waruziko nzapfa ntasetse?

Ese wansigiye iki

Hagati nk’ururimi

210.Mu gihuru cy’ururimbuko?

Aho ntari bubone ururimbiro?

Ese kuki wagiye

Utambwiye data

Ugatuma nsiragira

Nsabiriza ku ngufu

215.Uwambera data?

Iteka uko nsuye

Cya gituro cyawe

mpavana igitero.

uko nsomye ka kandiko

220.wasize usinye

ngasa nuwisogose igisongo.

abandi bana

bagira iwabo

 bakabatetesha bikwiye

225.naho njye wansize ku gasi

nanamye ntemye

ntegeye amaboko

abifuza kuyatwika

bakayavumbika akavaho

230.narushye uwakavuna.

ese mawe wamenye ko

umwana wawe

yitwa ibitindi gasani byose?

ni ikinyendaro,

235.icyana cy’indaya n’ibindi

nonese mawe

kuki bakwita indaya ?

ese ni ukugusebya?

Cyangwa byari ugushaka indamu?

240.Ngo nkunde ndamuke?

Ese ko numvana benshi

Ko duhuje imico

Twese tutari duhwitse

Aho  ntibakwangaga nkuko banyanga?

245.Ubu narakuze

Nabuze uwanyizera

Ngo ndi umwana w’indaya

Nta ndero!!!!!

Gusa bintera kwibaza niba

250.Ababuze indero bose

Ari abana b’indaya?

Bibaye ibyo ino

Indaya zaba ari uruhumbirajana!!

Mawe narushye uwakavuna

255.Ndatambuka bakanyikangamo

Umwana w’umwicanyi!!

Ahandi ndi umwana w’abagambanyi

Ndabyibuha bikaba icyaha

Nananuka bikaba ikindi!!

260.Ubu umugore rukumbi

Mfite ni inyandiko

Niyo inyemerera

Nkayitura intimba intimbura

Naho inshuti magara

265.Ngira ni amarira

Niyo ansunikira iminsi

Akangabanyiriza kubabara

nkabaho none

kuko kuramuka ejo

270.aba ari ikiroto mu bindi.

Mbaye Imana

Numva ntawe natuma

Avukira ku vumwa

Naca ubwoko

275.Nkimika ubumuntu

Kuko ubwo bwoko

Nibwo bwangize igikoko

Menyera ikiboko

Mbura amarangamutima

280.Uko mundeba narushye uwa kavuna.

Narushye uwa Kavuna

Nabuze epfo

Nabuze ruguru.

Ko binteye intimba

285.Bene wacu

Bamwe buzuye inzibutso

Ndajya kubunamira

Imitima ikambana ibihumbi

Bene data

290.Bakanshinja kwibonekeza

Bene mama

Bakabyita kurenzaho

Narushye uwa kavuna

Nabuze aho nivuza

295.Nabuze iwacu mpareba

Nubuze uwanyica

Mbura nuwanconca

Ngo ance ino

Narushye uwa kavuna

300.Bene wacu bamwe ni abazamu

Abandi baba i buzungu

Bamwe buzuye za gereza

Abandi buzuye inzibutso

Nabaye intabwa

305.Ntoragurwa n’agahinda

Karandera ndakura

Kangira uku nabaye

Kampyinagaza katarankoye

Mba igicibwa hose

310.None narushye uwa kavuna.

UMUSIZI TUYISENGE OLIVIER.

UMWAKA: 2018

Inkovu ziracyavirirana

 Umuvugo: Inkovu ziracyavirirana

Rwanda rwambyaye

Mpagaze kure

Muri ya misozi

Imwe yasizwe iheru heru

5.Ndoye ruguru

 Nibuka rwa rugamba

Rwagusaritse uruguma

Rukakwambura ingenzi

Numva ibikoba birankutse

10.Umutima urantorotse

Rwanda rwambyaye

Ese nzatire umutwe

Nguhimbire ibihozo?

Ko uwo nahoranye

15.Ubu ntawo

Wajanjaguwe n’ibikomere?

Mata 1994

Igihugu cyabaye igihuru

Igihango mu miryango

20.Kiratatirwa umututsi aratabwa

Yicwa nk’itungo

Atabwa ku gasi

Arashinyagurirwa bitavugwa

Amaraso ye

25.Asomya n’imisega

Imana nziza

Imwe y’u Rwanda

Yitahira itabajije

Bene u Rwanda

30.Tugira ngo yagaye indaro

Rwanda nkunda

Za nkovu ziracyavirirana

Amasura y’abasogoswe

Bwa buhiri n’imihini

35.Ya mihoro nabonye

bindara iteka mu nzozi

binzira buri joro

nabuze ihumure

natonganye no kugoyeka

40.nananiwe guceceka

aho bansogose bya bisongo

hahoramo imisonga,

aho bancumise rya cumu

hambuza kwicara

45.inkovu ziracyavirirana.

iyo nkwibutse Rwanda

ishavu riranganza

amarira akambanza

ngasa nusaze

50.nibutse iminsi

Interahamwe zitwambura ubumwe

Amazu yacu

Agahabwa inkongi

ya sano yacu

55.igasuhererwa igasiba isoko

mu ntimba intimbura

nibaza icyateye umunyarwanda

kwitera ntawa mutumye

akihekura imfura

60.agasigara ku gasi

aciriritse  yicuza.

Rwanda rwambyaye

Sinsibira namba

Gusurwa naya masura

65.Ya bya bibondo byawe

Byishwe urwagashinyaguro.

Mbe gihugu nkunda

Inkuru yanjye

Iteka isa n’ icumu

70.Uko nyitekereje

Iranterura ikancinya

Ikankora mu  nkovu

Ikava ubwo Ikavirirana,

 intimba ikamperana

75.Nkibaza ubusazi

Bwateye I Rwanda

Ngo umuntu yice

Uwa murwajije

Imyaka Magana

80.Akamurwanira ishyaka

Bakagabirana amashyo.

Mubyeyi wambyaye

Ntumpore uko undi

Mbabara cyane

85.Iyo mbonye Nyabarongo iriya

Nakwibuka ko yatembanye  iwacu

None habe n’agacu

Nababarizamo koko !

Inkovu zanjye

90.Zivirirana ubutarekera

Iyo nibutse umunsi

Ahakinaga imitavu

Hatambaga inkona

Inkongi irankongora

95.Ngashira numva

Rwanda mubyeyi,

Nabaye nk’igishushungwe

Ishusho y’ishavu

Yandemyemo igicumbi

100.Ndira ubudahagarara

Gusa uwampa umpoza

Nakwicara nkamubarira

Iby’inkovu zanjye

Ahari yenda

105.Yanjyana i Nyamagana

Nkahatura nkahaguma

Yenda nakira  uru ruguma.

Rwanda nkunda

Ndacyari inkomere

110.Urukumbuzi rurangurumanamo

Nkumbuye urungano

Nkumbuye iwacu

Nkumbuye babaziranenge.

Uzantumire bose

115.Ngo uzantangayo azantangire intashyo

Ambwirire bene u Rwanda

Ko mbakumbura cyane

Ijoro n’umunsi

Mbarota amanywa n’ijoro,

120.Gusa uwangeza mu ijuru

Ahari navurwa

Sinakongera kuvunywa

No kuvuga ko mbakumbuye

Nasubira ngaseka

125.Nkibagirwa rwa rwango

Rwakorewe inyoko Tusi

Bakagaburirwa tsese

Maze uwitsamuye

Bakamutsemba  urw’urubozo.

130.Ya majoro y’umwijima

Muri ya Mata

Imwe ya maraso

Yandemyemo inkongi

impora inkomoko ntihaye

135.ya mirabyo n’inkuba

byo muri Mata 1994

naya mvura nyamwinshi

naya myaka yeze

igasazira mu mirima

140.nkaho itagira banyirayo

za nduru z’abatangana

ya marira ya bene u Rwanda

bimpora imbere

nk’igicucucucu cyanjye

145N’ubu inkovu ziracyavirirana

Mata ntindi

Wandemyemo intimba

Nujya undora ndira

Ujye wishinja ibyaha

150.Dore ni wowe wangize incike

Rwanda rwanjye

Wabonye byinshi

Bakwambuye abawe

Mu itumba rya Mata

155.Wuzuye ibikomere.

Mbe Gihanga muhanga

Wowe wahanze u Rwanda

Umunsi utabaruka

Kazungu yazanye muzunga

160.Aducamo ibice

Bukeye turicana turacoca

Dupfa ubupfapfa

Nako ubusa

Kuko twese nabonaga dusa

165.Nizere ko wadusabiye kwa Nyagasani

Rwanda mubyeyi

Igihe ni iki

Ngo nikoranye icumu n’icondo

 Nshake  umuheto n’imyambi

170.Ndwanire urwambyaye

Amateka yanjye

Ni mabi bitavugwa ndabizi

Inkovu ziracyavirirana

Gusa nsanze ntawundi

175.Numwe wo kumvuza

Utari uwo tuva inda imwe.

Rwanda ndakuze urandora

None se

Abe ari njye ukudindiza

180.Ngukore mu nkovu ?

Ya majoro y’amaganya

Ni intimba amagana

Hinga mbyibuke

Ubundi mbyuke

185.Mbubakireho ejo hanjye

Rwanda rwiza

Irya miturirwa igutatse

Iyi yuzura ijoro n’amanywa

Ndayirora nkarira

190.Gusa nkarahira nkirenga

Nti ntawe uzayisenya

Ndaha mba nkubura

Iterambere rigutuye

Rituruka k’ubupfura

195.Nzaripfumbata ndibangire ingata

Ndyikorere cyane

Ndibwire bose.

Rwanda nkunda

Uri intwari byahamye

200.Umunsi bagutwika ugakongoka

Abawe tutakigoheka

Narakurebega kubw’akaga

Naroraga kakugarije

Ngahuga mboroga

205.Mbaza umuhisi n’umugenzi

Ahandi nzita iwacu

Kuko nabonaga wowe

Ubaye incike

Utanirerera n’incuke

210.Ngo uyibonere n’icumbi

None Rwanda

Dore uraganje

Ahari amatongo

Huzuye amataje

215.Ahakinaga inkongoro

Ubu harakina imitavu

Ahari ibihuru

Hatuye ibihunyira,

Ubu hari amashuri n’amamashini

220.Abawe bariga bakaminuza

Iyo mbonye imiturirwa

Imwe ikabakaba ijuru

Numva ntakwiye kujumarirwa

Ngo mperanwe n’ishavu

225.Kuko Rwanda urashoboye

Rwanda ngufitiye umwenda

Izi nkovu zivirirana

Nizi nguma zingundira

Sinzazemerera Ko zinsigarana

230. ngo nsare nsigare

Ahubwo izi nkovu

Uko zivirirana

Bizamviramo umuti ukuvura

Kuko bizatuma nshikama

235.Nshinyirize ngukorere

Maze ukomere

Ukire ibikomere

Rwanda rwambyaye.

Kuba nkuvuka

240.Si ipfunwe ngo mbipfukirane

Ni ikamba rikomeye

Reka mbikurane

Uko nibuka

Njye mpora naniyubaka

245.Maze uko undebye

Usingize icyo wambyariye

Munyarwanda ntiza amaboko

Twimure iby’amoko

Twimakaze Ubunyarwanda

250.Ingobyi twagabiwe.

Wowe ukigengwa

N’ingengabitekerezo ya Jenoside

Nturi imfura namba

Wanga u Rwanda

255.Urwifuriza ibifutamye.

Rwanda rwambyaye

Nzakubera umuvunyi

Nkuvure aho uvunitse

Nkuvuge aho ndi

260.Nkwambare ijoro n’amanywa

Nubwo inkovu zikivirirana

Urukumbuzi ku bacu

Rukiri rwose

Uzamvure tuvuzanye

265.Unkande dukomezanye

Unkunde dukorane

Unyubake nkubake

Nzakuvugira ibihozo

Nkuririmbire ihumure

270.Uhorane icyizere

Cyejo hazaza

Maze abo ubyaye

Bazabyiruke babyina

Ubumwe mu banyarwanda

275.N’iterambere rikomeye.

UMUSIZI TUYISENGE OLIVIER

MATA 2018