Thursday, January 26, 2017

NIba Uzampeka Mpamya Umugongo




Umuvugo: Niba uzampeka mpamya umugongo


niba uzanyica
ncukurira none
niba uzancutsa
ntakiri bucura
5.cudika nabaza ncecekesha.

windindiza ndarushye
ndambiwe imbere umbeshya
niba uzampeka mpamya umugongo
ungabire nganze
10.cyangwa unjugunye njorwe.

mpamiriza impamo
umpishurire impamvu
uhora umpunga
umpisha umpanahana
15.unyita ibitabaho

niba uzampeka mpamya umugongo
mwami uganje
ngabire itaganda
nagutakambiye utabimbwiye
20.ngukorera utankoresha

ndambiwe iki cyago
cyice nyambura icyasha
nyambika icyiza
niba ubona cyinkwiye
25.niba uzampeka mpanya umugongo.

umpindurire indaro
ndambiwe iyi indindiza
nacumuye iki mucunguzi?
gituma data
30.uncurika ukancurura?

ukangabira inyambo
ako ka mwanya ukanyaga
ukampa impamba
ntarayumva impumeko
35.ukayimpubuza wayimpaye

nagusenze ubudasiba
none ndinze nsaza!
nsirisimba nsaba!?
za missa wansabye
40.narazisenze zose

ngusabye unsezeranya
kuzansanira umusazirwa
dore ko atari inzu
inzu arimwe yawe
45.ibaye itongo utarayitaha!

niba uzampeka mpamya umugongo
undeke nduhuke
untize iyi miturirwa
nyitahe numve
50.mve mu mvune

ko wandemye
ku bushake bwinshi?
ushimye guhora banshushubikanya?
nikoreye agataro?
55.umuto mubawe atendera umugongo?

niba uzampeka mpamya umugongo
undeme amaguru
undeme amaboko.
ese koko dawe?
60.ushimye koko

ko mba umucancuro?
byacika nkicuruza?
ese ni wowe ushima
ko  nirirwa njijisha
65.abawe jambo?

mbajujubya mbiba?
ese aha nicaye?
nsaba umuhisi?
nsaba umugenzi?
70.urabikunda mbikomeze?

uri umuhanzi
uri umuhanga
wampaye inganzo
teka ijabiro iyo
75.jugunya umujinya

tuganire ibi
uzadusura ryari?
umva nanjye raa!!
niba imyaka igihumbi
80.ihura n'umutaga umwe?

kuri wowe
aho waza
mu cyumweru
ubuvivi bwanjye
85.bwo bwaguca iryera?

naratuje bitabaho
ubu natoboye
ngo nkubaze
nibikunda unsubize
90.nseruke nseka.

kuko ndarushye
niba uzampeka mpamya umugongo
umpe impano
umpunze impuha
95.umpe impamvu yibi nshire impumpu.

Dore imyaka n'ibihumbi
nkoma inyuma
ntunyumve ukanyima
ntunkize ukanyikinga
100.ukanteza itorero

bati uriya
igituma adatoshye
ntajya atura
igituma adasubizwa
105.arasaba akanasambana

mbese igisebo?
n'igisuzuguriro?
wasanze kubinsiga
aribyo byasigiriza
110.bwa budasa usanganywe?

nsubiza gaa ndabaza!?
niko se mwami?
wowe udutera ijabo
ryo gukorera ijuru
115.nkujoye wajurira?

nta wacu
ndi incike
n'amakuru nz'igice
umubyeyi umbyara
120.yari igicibwa

yaracuditse naya mico
yo gucucura abiciraho
atunzwe no gutanga
atangira ikiranguzo
125.bwa buzima bwe!!

naho Data
ari umurwanyi
ari umurwayi
igisambo ruharwa
130.atunzwe n'utwabandi

none dore nanjye
ungize indarakigunda!
undaranyije n'intugunda!
ntaho gutaha!
135.aho nagatashye ni amatongo

abo  nakwitabaje ni abatindi
abo twagacuditse ni abacancuro
nkore iki?
nbeho nte?
140.ko naho nagaciye

wahaciye ukahacengera
icyintunze cyose
ukacyita icyaha
igihembo cyanjye
145.kikaba ikiboko!

ese utandenganyije
ubona utanjijisha?
ndamye nde?
ndeke nde?
150.ko njye binshobeye?

inshuti zanjye zose
wazirunduriye mu mayira
uzima kwihaza!
uziha kwiheba!
155.ubaha gupfa

bakimpfumbase mapfubyi
bataramanye n'ubutindi
batongana n'ubutunzi
bakuvumira ku gahera
160.ngo batabivuga

kuko wabavuma ukabavaho
ukabazabashora ku bushake
muri wa muriro wawe
umwe utazima
165.wabaye urwitwazo!!

rwo kuduhahamura
ngo dukunde tuguhishire
udushenguze ishavu
ibyo simbikangwata
170.nta muriro nzi

urenze uko inzara inzonga
nuko inzangano zinzambya
mbe mwami uganje ijabiro?
niba uzampeka mpamya umugongo
175.uhindure intekerezo

ujye ahagaragara
twikoranye tugusure
utugire inama
nicyo ubereye Imana
180.mwami nkunda

udutungishe ibyo tudatunze
uduhungishe ibyo udashaka
udushyire ku rwego
twese rwiza
185.rwizihira buri ugukorera

ariko se Mana
aho nahereye
nisiba nisararanga
aya masaha
190.unsuye ukansanga aha?

aka karuri kanjye
ukagasenya ukahansanga
aka ka mudasobwa
ugaterura ugakubita hasi
195.ukambaza ibyo ndimo

sinasara se?
ukansaba nawe
kuguheka ibitajishuka
sinashaka ibyo nsubiza?
200.nkabibura ukanseka?

mwami uganje
sinakubereye intumwa nto
wantumye ikantarange
mu misozi n'ibisiza
205.mu bikombe n'ibibaya

ndaza ndatumika
sinarengeraga erega twaganiraga
uri umutaramyi ndakuzi
nturi igifura
210.ibi ntibikurakaze ngo umbabaze!

umbambishe mbabare
nyitumire ntahe
gusa nabirya
nagusabiye mu butayu
215.uzabyiteho byose uzambwira

reka ntahe
cyangwa mpamagara ntahe!
oya ndisubiye
reka mbanze nsige
220.nsange nabo nasize

hakurya ku misozi
basirimba basenga
mbasomere ibyo nsanze
mbakundishe ibyo wakunze
225.babikomereho babizi

niba uzampeka mpamya umugongo
nshuti nshima
nganji ngannye
reka uburyarya
230.hamya ibizima

ukunde Rutigisanyanja
naho ibi byo
n'ubusizi nasukaga
si ukuri nagutozaga
235.ni ubuhanzi bwambazaga


gana imana
uyikorere bigikunda
uyishake bigishoboka
niba uzayiheka uyihamye umugongo
240.si umuntu ubeshya



UMUSIZI TUYISENGE OLIVIER
TEL: 0787277631

















Thursday, January 5, 2017

Yantumye ku Itorero





Umuvugo :  yantumye  ku itorero


Nganji mwese
Ngabire nshoje none
Rugira rugena byose
Umugenga utugenga
5.Akagenga byose

Yangendereye butaracya
Angenera iyi nganzo
Ngo nyigegene neza
Nyibagenere  mwese
10.Muyigimbe mwembi

Yantumye ku itorero
Ngo mu mukorere bigukunda
Mu mushake bigishoboka
Mu maramarize muri we
15.Yantumye ku itorero

Ngo izo feza
Zirya z’amafuti
Ari  bugufi
Kuza akazifata
20.Akazishyira mu ifuru zigafumbeka

Yantumye ku itorero
Ngo ibyo kumukorera
Tubikunde bitubemo
Tumuture ibitambo
25.Bitari ibyo kumuryarya

Tumusenge ubudasiba
Tumusange tumwisunge
Tumusabe azadusubiza
Tumaramarize mu mana
30.Rutigisinyanja umugenga

Yantumye ku itorero
Ati umbwirire abo
Bagize inzu yanjye
Inzira y’inzangano
35.Indiri y’amatiku

Urwuri rw’ibinyoma
Ko ntawe umbeshya
Mba mbona
Ko nibatisubiraho
40Nsa nuri bubasohore

 Ngashyira kure
  
Hakurya mu myanda
Umburirire babandi
Bafashe ku bushake
Wa mubiri
45.Nabambitse mbikunze

Aho kundamya ukamwaza
Ko wamwanya ari uyu
Ngo bahinduke
Ntarabandurura ndatakaye
50.Ngo mbate ahadaturwa

Yantumye ku itorero
Ko agitetse ijabiro
Ntamujinya, yajugunye
Akiturije ategereje
55.Kubona mu mutahaho

Mugaca bugufi
Mukicuza ibicumuro
Akicaye kuri  ya ntebe
Y’impuhwe n’imbabazi
60.Yantumye ku itorero

Ko arambiwe cyane
Babapfapfa  b’ino
Bakimupfobya  bipfuritse
Bikimutuka abatunze
65.Bakamujora akabareka

Ngo arambiwe cyane
Uru rusaku rwacu
Rutahinduka namba
Ruhora mu byaha
70.Ruzira ibyiza

Yantumye ku itorero
Ngo mwimike urukundo
Mwimure ubugome
N’ubugambanyi  mwagabanye
75.Mu mwimike nk’umwami

Arambiwe cyane
Iyi kamere dukunda
Ubu busazi bwo gusambana
Bwo bwamusesemye
80.Bwuzuye bwasabye



Yantumye ku itorero
Ko abamarayika be
Bakereye itabaro
Aho kugumya gutukwa
85.Arabatuma baturimbure

Arabaha urwabya rwe
Urwa mbere
Barusuke mu isi
Abaserukiye sekibi
90.Basurwe n’ibisebe

Urwakabiri
Asuke mu nzuzi n’imigezi
Twirirwa twidegembyaho
Bisabe amaraso maso
95.Dusuhererwe twese

Urwa gatatu asuke
Mu zuba
Iri turwara tukota
Twakonja rikadushyushya
100.Isi ihinduke umuyonga

Yantumye ku itorero
Ko inzabya ari ndwi
Kandi ni indwano
Aba marayika
105.Biteguye bitarabaho

Yantumye ku itorero
Ngo mbaburire
Nkoresheje ubu busizi
Nicyo gituma murora
110.Nzindutse ntazimiza

Yantumye ku itorero
Ko ibanga arangiye ingenzi
Ayi cya gitabo
Kimwe k’imizingo ibihumbi
115.Aricyo kibitse ijambo

N’  ukuri gukomeye ko gukoreshwa
Icyo ni bibiliya
Arantumye kandi
Ngo mwitonganira ibitubaka
120.Babiteranya mukanatukana

Idini ryiza ryemewe
Ritazimuka yimitse
Ritazatsembwa yatsiritse
Ni amahoro
125.Si amahane

Idini rindi
Ni umutima wicuza
Umutima utuje
Ukunda ugakunda
130.Ufasha abatishoboye

Yantumye ku itorero
Ngo mbibutse ko
Twese yaturemye kimwe
Akadukunda kimwe
135.Ngo buri umwe wese

Narora mugenzi we
Amubone mu ishusho ye
Aho kumuhiga ngo bamarane
Amushake bakurane
140.Bakorane bakundanye

Ng’iyi impine
Yibyo yampaye
Ngo nyibakwizemo ibabemo
Ubwo nsoje
145.Reka nsubire ku isoko
Niyongera kuntuma
Nzatambuka  nanone
Ntumike ibyo yantumye
Kuko uriya
150.Niwe tuvomaho ubushake

Bwo gukorera ijuru
Nari intumwa ndatashye
Gusa muzirikane ibi
Mumukorere bigikunda
155.Mumushake bigishoboka

Mumusenge ubudasiba
Ntacyo muzabura
Azabambika abakwize
Abakunde bikomeye.
160.Mumbwirire nabatari aha!



 UMUSIZI TUYISENGE OLIVIER
0787277631