UMUVUGO: Nkangukiye mu rukaragata
nkangukiye mu rukaragata
nteruye intambwe
ntangiye ngo ntahe
nkurikiye inkora
5.nkomwa mu nkokora
N'igitero gitunguranye
giturutse ku mana y'uruganda
mbazwa ibibazo uruhuri
bati
ugenderera ute?
10.mwikorezi utavunyishije?
nti nkangukiye
mu rukaragata
igicuku
kinihira
nari ku gacupa
sinzi uko
nacutse
15.muce inkoni
izamba.
nkipfisha
mvuga ibitabapfu
amaso
agaburirwa bwangu
ntahwa
n'umushyitsi
mbona igitero
20.gitangaje
gitungutse!
intore
y'umukogoto
uri ku mukondo
akaba igikwerere
mbona amaso atari aya
25.yari umutaramyi i mbirima na matovu.
mbonye mbonekerwa
ntekerezanya intinyi
nti mbe kandi?
ibi ni bya bitangaza?
30.twatekerezaga mu mitaga iza?
ndoye hakuno
mbona abasore b'ibisage
inkumi z'amasunzu
abasore bashinjagira gitore
35.bitamirije imitana.
n'imiheto y'imironko
nkuka umutima
ba nyamwali baje
mbona abaserukanye ibisabo
40.abandi ibyansi.
mbura amahoro
mbona ba mucyurabuhoro
baseruka nkabari mu rubohero.
n'umujinya mwinshi
45.bakuranywa urusyo n'ingasire.
nsurwa n'ubwoba
ubwenge bugaruka bwangu
mbura ubwishyu
nibaza impamvu
50.nkangukiye mu rukaragata.
nkipfunda imitwe nibaza
ndoye mbona
za nkuba zesa
ba babasore b'ibisage
55.haserutse shebuja
arafora araforora
ahamya igiti
kimwe inganzamarumbo
umurinzi w'urukaragata
60.ntahwa n'ubwoba
umwijima ucura ubwo
nikeka icyaha
amavi ngabira ubutaka
twese turubama
65.dusa nk'abaramya
rwagati mu nganzamarumbo
haturuka igikomerezwa
ugaragiwe n'ingabo uruhuri
ntekereza bwangu
70.icyatumye nkangukira mu rukaragata!
yivuga imyato
yikora mu mitana
yiyereka abatoranyijwe
akora mu mironko
75.yibwira abarangamiramyambi
ati ndi
rwikubira abanyibasiye
uwatanaze iyi ndaro
uwahanze inka n'ingoma
80.ndi nyir'u Rwanda.
ati ngiy'ingarigari
aho ntagabiye inganji
urukaragata nkunda
ubusitani bw'imitsindo
85.aho ntasomeye umukipfu
simpasomere umutsama
inturire
cyangwa inkangaza.
igituma aya
madakika
ntatetse ijabiro
90.nzanywe n'umujinya no kujora.
ako kanya
umwijima urakomera
umwuzajoro ikivura nyamwinshi
kimwe k'ibijojoba amajana
95.kisuka mu rukaragata
inkuba zirakubita
imvura icogoye
ndoye inganzamarumbo
mbona ni
injege
100.nibaza
niba ari inzozi
ba nyamwali
beza
bateze
amasunzu
bansanganiza
ibyansi
bansanganiza
ibisabo
105.bati ujye
iyo iwanyu
ubabwire
bongere bacunde
ameza azira
gishegesha
bongere bagabe
bagabirane batagambana
110.ngicyo icyatumye
ukangukira mu rukaragata.
abo ku rubohero
banyegereza ingasire
banyegereza urusyo
115.nsa nk'utungurwa!!
bati gira utahe
utahane ubu butumwa
nyir'u Rwanda yatumye
uti basye amahoro
120.dore urusyo n'ingasire
bayashigishe bigishoboka
buzuze intango
bazamutumeho batarame
bayasangire ku isoko
125.buri umwe asomye undi!
mbona impamvu
nkangukiye mu rukaragata
ba basore b'ibisage
bansanganiza ya miheto y'imironko
130.bati nyir'urukaragata
databuja yatumye
ngo wende
iyi miheto y'imironko
uzasura ibidahuje isura
135.n'isango nasize
uzamusahure ibyo binsebya
umusobeke amahoro.
haciye igihe gito
umutwarasibo aransanga
140.ampa uyu muzingo
ngo nzawusomere
abasangirangeendo bose
ntaha ntuje
mbona impamvu
145.nkangukiye mu rukaragata
UMUSIZI TUYISENGE
OLIVIER