Narushye Uwa Kavuna.

Umuvugo: Narushye uwa Kavuna

Cyo ngwino umvure

Cyangwa umvushe

Nubundi narushye

Uwa Kavuna.

5.Umunsi wanze kunsibanganamo

N’umunsi uva inaha

Nkagutwaza umusaraba

Nkakurenza amataba,

Nabaye ibandi ndimenya

10.Bene nyoko banyica numva

Narushye uwa Kavuna.

Umunsi ugenda

Nabaye imbobo

Mbura imbamutima

15.Ntemana n’abaturanyi

Narushye uwa kavuna.

Ba bakobwa wadusiganye

Babaye indaya kubw’indamu

Njye ndi indindagire

20.Amaguru yabo

Arantunga nkaramuka

icyoroshye cyabo

kimpesha icyubahiro

nkarya kabiri

25.Narushye uwa Kavuna.

Ubu nsa nk’akavurivundi

Ndi mu itsinda ry’amabandi

Igikundi ndimo

Baragihisha uruhindu

30.Narushye uwa kavuna

Ba masenge wasize

Ni ibisambo

N’amasura masa

Bandiye umutima

35.Nsigariye ku mano

Naho ba marume

Bandaza mu rume

Ndira mpogora

Barangambanira ngo bangabize

40.Ibisare by’ibisimba

Ngo ihiii ntibashaka

Icyohe cy’ikigande

Icyana cy’igihutu

Aho iwabo !!

45.Barahashaka imfura

Z’imbavu ndende

Zirya nk ‘izabyigeze

Ureke ibihutu bibyigera

Narushye uwa Kavuna

50.Mumvure cyangwa mumvushe.

Ba bakobwa wadusiganye

Barabasohoye bo barabasibye

Ngo ni ay’ubusa

Nta n’uteze kubasaba

55.Nuwasara ntiyabarengereza igare

Amashuri yo murayanganya

Amazuru yabo mabi

Yabimishije ubutoni

Bene wanyu

60.Babatoza gukuka

Naho guseruka

Hazaseruka imfura zikibyiruka

Ese mawe

Ko unduta wazandangiye

65.Uwazanye ubwo bunyagwa

Bw’ubwoko

Ngo mutsinde iyo?

Narushye uwa kavuna

Umunsi nkurenzaho itaka

70.Ibyago nabiburiye umupaka

 Hambere aha

Sogokuru yasutse umusururu

Nsomyeho ahindura isura

Igicuma acyirenza urugo

75.Ngo hato amaraso yanjye

Ativanga naye

Akitwa umuhutu!!!

Umunsi nguherekeza ndira

Nanubu ndacyahogora

80.Niburiye isano

Nabaye igicibwa

Ndahungabana ntazicyo nzira

Iyo ngeze ahakabaye kwa Data

Bahuruza imihana

85.Hafi kuva imyuna

Ngo baze barebe ruharwa

Urwana rwo mu batutsi

Rw’ubuzuru bw’ubuzingo

N’ubutoki burebure

90.Nk’ubutagira icyo bukora

Bakantuka ibibi byose

Nasaba isano

Ngasanga nd’igisimba

Nti ni gashyire nzira

95.Gatahe nako gatumuke

Sekuru yafungishije se

None bagatumye nk’ingenza

Narushye uwa Kavuna.

Mama umunsi ugenda

100.Numvise nakujya inyuma

Iwanyu banyita ibandi ry’umuhutu

Kwa data bakanyita

Urwana rwo mu batindi b’abatutsi

Navuze iwacu

105.Mbura n’iwanyu

Narushye uwa kavuna

Ubu bene mama

Ni amabandi

Ni indaya butwi

110.Indaya zitagira ubwoba,

Yewe zitagira n’ubwoko.

Wambwira aho uri

Mubyeyi nakwisurira

Ngasuka amarira

115.Nterwa naza ndirimbo mbi,

Ndirimbirwa urwunge.

Nabonye byose byanze

Nibera ku muhanda

Nubwo uhanda

120.Ibisigazwa n’imisigi

Bisumba amasosi

Asize incyuro

N’imigati itatse imitongero.

Bene mama

125.Bakadandaza amagara

Nanjye ingagari

Nziba amagana.

Mama mubyeyi

Ntumaho roho

130.Yawe indinde indengere,

Benewanyu barandeba

Barampiga ngo bampitane

Kuko iyo bandeba

Inzigo irazuka

135.Bakanyitiranya n’ikishi bakanyishisha.

Narushye uwa kavuna

Mwindenganya gaa!

Sinjye wishe!!

Hishe data

140.Sinanjye wasambanye ahatariho

Hasambanye mama!!

Ibyo byose ndazira ibyiki?

Ibyo mupfa muzabipfane

Njye singira ubwoko

145.Nabuze kivura,

Mbura kivugira

Mbona gishengura.

Uyu mutima uyu ntunze

Untota gupfa nkavaho

150.Kuko ntacyo maze!

Ndazira indeshyo

N’imbavu mbungana!!

Uwazikuramo zikamvamo

Numva ari ibikunda

155.Urupfu narutumira tukituranira

Tugasangira umusigi

Nabona twasabanye

Nkarusaba kuncyura

Nkava inaha

160.nkajya ahari amahoro ahinda.

Ayo madayimoni bavuga

Bazayanteje nkaba nk’igishushungwe

Ko ahari bakwishima

Ayo marozi babeshya

165.Abahe ko atangeraho?

Ngo nyagure nyasome

Njye nirirwa ku gasozi

Nambaye ubusa

Ibinyita bisimbuka

170.Ko ahari bene ubwoko

Ubwonko bwawe

Bwakuzura ibyishimo!!

Niburiye ubwoko

Nabaye nyakamwe koko

175.Igihugu cyuzuye bene wacu?

Nabaye incike

Mbura nuwancira incuro

ngo nuko hamwe

Ndi icyana cy’igihutu

180.Ahandi ndi icyana cy’igitutsi?

Uyu mutima utera

Wankundira ugahagarika gutera

Gitera akanshakira

Ahandi ho gutura

185.Hataba ihohotera?

Ese mama?

Umbyara warabyishimiye

Ese wambyariye icyenda?

Hoya nako ni arindwi

190.Ahari nicyo gituma

Bantera imirwi!!!?

Ese ujya kumbyara

Ubu wabitinzeho

Sinkurenganya nibyakuguyeho?

195.Ese uziko umunsi utabaruka

Wasize utambwiye data ?

None uwo bantungiye agatoki

Ni ikigabo kihaye

Ndakireba nkabona kitambyara

200.Rwose barakibeshyera

Ese nawe wari warubatse ku moko?

Mbihindure nkwite umugenzi

Nzavugeko navutse ukwanjye

Nka Merikisedeki wa mwami?

205.Wavutse nta se nta Nyina?

Ese mama ujya kumbyara

Waruziko nzapfa ntasetse?

Ese wansigiye iki

Hagati nk’ururimi

210.Mu gihuru cy’ururimbuko?

Aho ntari bubone ururimbiro?

Ese kuki wagiye

Utambwiye data

Ugatuma nsiragira

Nsabiriza ku ngufu

215.Uwambera data?

Iteka uko nsuye

Cya gituro cyawe

mpavana igitero.

uko nsomye ka kandiko

220.wasize usinye

ngasa nuwisogose igisongo.

abandi bana

bagira iwabo

 bakabatetesha bikwiye

225.naho njye wansize ku gasi

nanamye ntemye

ntegeye amaboko

abifuza kuyatwika

bakayavumbika akavaho

230.narushye uwakavuna.

ese mawe wamenye ko

umwana wawe

yitwa ibitindi gasani byose?

ni ikinyendaro,

235.icyana cy’indaya n’ibindi

nonese mawe

kuki bakwita indaya ?

ese ni ukugusebya?

Cyangwa byari ugushaka indamu?

240.Ngo nkunde ndamuke?

Ese ko numvana benshi

Ko duhuje imico

Twese tutari duhwitse

Aho  ntibakwangaga nkuko banyanga?

245.Ubu narakuze

Nabuze uwanyizera

Ngo ndi umwana w’indaya

Nta ndero!!!!!

Gusa bintera kwibaza niba

250.Ababuze indero bose

Ari abana b’indaya?

Bibaye ibyo ino

Indaya zaba ari uruhumbirajana!!

Mawe narushye uwakavuna

255.Ndatambuka bakanyikangamo

Umwana w’umwicanyi!!

Ahandi ndi umwana w’abagambanyi

Ndabyibuha bikaba icyaha

Nananuka bikaba ikindi!!

260.Ubu umugore rukumbi

Mfite ni inyandiko

Niyo inyemerera

Nkayitura intimba intimbura

Naho inshuti magara

265.Ngira ni amarira

Niyo ansunikira iminsi

Akangabanyiriza kubabara

nkabaho none

kuko kuramuka ejo

270.aba ari ikiroto mu bindi.

Mbaye Imana

Numva ntawe natuma

Avukira ku vumwa

Naca ubwoko

275.Nkimika ubumuntu

Kuko ubwo bwoko

Nibwo bwangize igikoko

Menyera ikiboko

Mbura amarangamutima

280.Uko mundeba narushye uwa kavuna.

Narushye uwa Kavuna

Nabuze epfo

Nabuze ruguru.

Ko binteye intimba

285.Bene wacu

Bamwe buzuye inzibutso

Ndajya kubunamira

Imitima ikambana ibihumbi

Bene data

290.Bakanshinja kwibonekeza

Bene mama

Bakabyita kurenzaho

Narushye uwa kavuna

Nabuze aho nivuza

295.Nabuze iwacu mpareba

Nubuze uwanyica

Mbura nuwanconca

Ngo ance ino

Narushye uwa kavuna

300.Bene wacu bamwe ni abazamu

Abandi baba i buzungu

Bamwe buzuye za gereza

Abandi buzuye inzibutso

Nabaye intabwa

305.Ntoragurwa n’agahinda

Karandera ndakura

Kangira uku nabaye

Kampyinagaza katarankoye

Mba igicibwa hose

310.None narushye uwa kavuna.

UMUSIZI TUYISENGE OLIVIER.

UMWAKA: 2018

Inkovu ziracyavirirana

 Umuvugo: Inkovu ziracyavirirana

Rwanda rwambyaye

Mpagaze kure

Muri ya misozi

Imwe yasizwe iheru heru

5.Ndoye ruguru

 Nibuka rwa rugamba

Rwagusaritse uruguma

Rukakwambura ingenzi

Numva ibikoba birankutse

10.Umutima urantorotse

Rwanda rwambyaye

Ese nzatire umutwe

Nguhimbire ibihozo?

Ko uwo nahoranye

15.Ubu ntawo

Wajanjaguwe n’ibikomere?

Mata 1994

Igihugu cyabaye igihuru

Igihango mu miryango

20.Kiratatirwa umututsi aratabwa

Yicwa nk’itungo

Atabwa ku gasi

Arashinyagurirwa bitavugwa

Amaraso ye

25.Asomya n’imisega

Imana nziza

Imwe y’u Rwanda

Yitahira itabajije

Bene u Rwanda

30.Tugira ngo yagaye indaro

Rwanda nkunda

Za nkovu ziracyavirirana

Amasura y’abasogoswe

Bwa buhiri n’imihini

35.Ya mihoro nabonye

bindara iteka mu nzozi

binzira buri joro

nabuze ihumure

natonganye no kugoyeka

40.nananiwe guceceka

aho bansogose bya bisongo

hahoramo imisonga,

aho bancumise rya cumu

hambuza kwicara

45.inkovu ziracyavirirana.

iyo nkwibutse Rwanda

ishavu riranganza

amarira akambanza

ngasa nusaze

50.nibutse iminsi

Interahamwe zitwambura ubumwe

Amazu yacu

Agahabwa inkongi

ya sano yacu

55.igasuhererwa igasiba isoko

mu ntimba intimbura

nibaza icyateye umunyarwanda

kwitera ntawa mutumye

akihekura imfura

60.agasigara ku gasi

aciriritse  yicuza.

Rwanda rwambyaye

Sinsibira namba

Gusurwa naya masura

65.Ya bya bibondo byawe

Byishwe urwagashinyaguro.

Mbe gihugu nkunda

Inkuru yanjye

Iteka isa n’ icumu

70.Uko nyitekereje

Iranterura ikancinya

Ikankora mu  nkovu

Ikava ubwo Ikavirirana,

 intimba ikamperana

75.Nkibaza ubusazi

Bwateye I Rwanda

Ngo umuntu yice

Uwa murwajije

Imyaka Magana

80.Akamurwanira ishyaka

Bakagabirana amashyo.

Mubyeyi wambyaye

Ntumpore uko undi

Mbabara cyane

85.Iyo mbonye Nyabarongo iriya

Nakwibuka ko yatembanye  iwacu

None habe n’agacu

Nababarizamo koko !

Inkovu zanjye

90.Zivirirana ubutarekera

Iyo nibutse umunsi

Ahakinaga imitavu

Hatambaga inkona

Inkongi irankongora

95.Ngashira numva

Rwanda mubyeyi,

Nabaye nk’igishushungwe

Ishusho y’ishavu

Yandemyemo igicumbi

100.Ndira ubudahagarara

Gusa uwampa umpoza

Nakwicara nkamubarira

Iby’inkovu zanjye

Ahari yenda

105.Yanjyana i Nyamagana

Nkahatura nkahaguma

Yenda nakira  uru ruguma.

Rwanda nkunda

Ndacyari inkomere

110.Urukumbuzi rurangurumanamo

Nkumbuye urungano

Nkumbuye iwacu

Nkumbuye babaziranenge.

Uzantumire bose

115.Ngo uzantangayo azantangire intashyo

Ambwirire bene u Rwanda

Ko mbakumbura cyane

Ijoro n’umunsi

Mbarota amanywa n’ijoro,

120.Gusa uwangeza mu ijuru

Ahari navurwa

Sinakongera kuvunywa

No kuvuga ko mbakumbuye

Nasubira ngaseka

125.Nkibagirwa rwa rwango

Rwakorewe inyoko Tusi

Bakagaburirwa tsese

Maze uwitsamuye

Bakamutsemba  urw’urubozo.

130.Ya majoro y’umwijima

Muri ya Mata

Imwe ya maraso

Yandemyemo inkongi

impora inkomoko ntihaye

135.ya mirabyo n’inkuba

byo muri Mata 1994

naya mvura nyamwinshi

naya myaka yeze

igasazira mu mirima

140.nkaho itagira banyirayo

za nduru z’abatangana

ya marira ya bene u Rwanda

bimpora imbere

nk’igicucucucu cyanjye

145N’ubu inkovu ziracyavirirana

Mata ntindi

Wandemyemo intimba

Nujya undora ndira

Ujye wishinja ibyaha

150.Dore ni wowe wangize incike

Rwanda rwanjye

Wabonye byinshi

Bakwambuye abawe

Mu itumba rya Mata

155.Wuzuye ibikomere.

Mbe Gihanga muhanga

Wowe wahanze u Rwanda

Umunsi utabaruka

Kazungu yazanye muzunga

160.Aducamo ibice

Bukeye turicana turacoca

Dupfa ubupfapfa

Nako ubusa

Kuko twese nabonaga dusa

165.Nizere ko wadusabiye kwa Nyagasani

Rwanda mubyeyi

Igihe ni iki

Ngo nikoranye icumu n’icondo

 Nshake  umuheto n’imyambi

170.Ndwanire urwambyaye

Amateka yanjye

Ni mabi bitavugwa ndabizi

Inkovu ziracyavirirana

Gusa nsanze ntawundi

175.Numwe wo kumvuza

Utari uwo tuva inda imwe.

Rwanda ndakuze urandora

None se

Abe ari njye ukudindiza

180.Ngukore mu nkovu ?

Ya majoro y’amaganya

Ni intimba amagana

Hinga mbyibuke

Ubundi mbyuke

185.Mbubakireho ejo hanjye

Rwanda rwiza

Irya miturirwa igutatse

Iyi yuzura ijoro n’amanywa

Ndayirora nkarira

190.Gusa nkarahira nkirenga

Nti ntawe uzayisenya

Ndaha mba nkubura

Iterambere rigutuye

Rituruka k’ubupfura

195.Nzaripfumbata ndibangire ingata

Ndyikorere cyane

Ndibwire bose.

Rwanda nkunda

Uri intwari byahamye

200.Umunsi bagutwika ugakongoka

Abawe tutakigoheka

Narakurebega kubw’akaga

Naroraga kakugarije

Ngahuga mboroga

205.Mbaza umuhisi n’umugenzi

Ahandi nzita iwacu

Kuko nabonaga wowe

Ubaye incike

Utanirerera n’incuke

210.Ngo uyibonere n’icumbi

None Rwanda

Dore uraganje

Ahari amatongo

Huzuye amataje

215.Ahakinaga inkongoro

Ubu harakina imitavu

Ahari ibihuru

Hatuye ibihunyira,

Ubu hari amashuri n’amamashini

220.Abawe bariga bakaminuza

Iyo mbonye imiturirwa

Imwe ikabakaba ijuru

Numva ntakwiye kujumarirwa

Ngo mperanwe n’ishavu

225.Kuko Rwanda urashoboye

Rwanda ngufitiye umwenda

Izi nkovu zivirirana

Nizi nguma zingundira

Sinzazemerera Ko zinsigarana

230. ngo nsare nsigare

Ahubwo izi nkovu

Uko zivirirana

Bizamviramo umuti ukuvura

Kuko bizatuma nshikama

235.Nshinyirize ngukorere

Maze ukomere

Ukire ibikomere

Rwanda rwambyaye.

Kuba nkuvuka

240.Si ipfunwe ngo mbipfukirane

Ni ikamba rikomeye

Reka mbikurane

Uko nibuka

Njye mpora naniyubaka

245.Maze uko undebye

Usingize icyo wambyariye

Munyarwanda ntiza amaboko

Twimure iby’amoko

Twimakaze Ubunyarwanda

250.Ingobyi twagabiwe.

Wowe ukigengwa

N’ingengabitekerezo ya Jenoside

Nturi imfura namba

Wanga u Rwanda

255.Urwifuriza ibifutamye.

Rwanda rwambyaye

Nzakubera umuvunyi

Nkuvure aho uvunitse

Nkuvuge aho ndi

260.Nkwambare ijoro n’amanywa

Nubwo inkovu zikivirirana

Urukumbuzi ku bacu

Rukiri rwose

Uzamvure tuvuzanye

265.Unkande dukomezanye

Unkunde dukorane

Unyubake nkubake

Nzakuvugira ibihozo

Nkuririmbire ihumure

270.Uhorane icyizere

Cyejo hazaza

Maze abo ubyaye

Bazabyiruke babyina

Ubumwe mu banyarwanda

275.N’iterambere rikomeye.

UMUSIZI TUYISENGE OLIVIER

MATA 2018

Impumbya z'impuha.

Umuvugo: Impumbya z'impuha

Reka nzure inzira
Nziture ya nzoga
Mpange iyi mpakanizi
Indaza ibigunda
5.Mu bigunira nigunze.

Hambere mbizi
Tukiri imbumbe
Imbamutima zigitinya gutinya
Mukabutindi Tunuri
10.Agitangatangiye I rutunga.

Musaniwabo uriya
Abisi b'ibisunzu
Bise nyamusa n'inyange
Bakamushuka ubushongore
15.Bakamukiza agikikiwe

Kandi abatwaye imisozi
Gacu naza Rwabicuma.
Bakimwa n'igicuma
Bakabaciririkanya nk'igiciro
20.Bagahemba amagufa n'umufa

Woshye impigi
Nazo zitari impinirakure.
Impumbya z'impuha
Nizambawe n'impigi
25.Ngo zirongore Kabare

Kandi no ku bwa Kalinda
Zarabanje kubunda ibigunda
Impundu z'impuha
Nizo batumye i Bugibwa
30.Zihasanze ubwandu

Ziyoboka bwangu
Impundu z'impuha
Nta Rusimbi ni urusimba.
Inganzo yambereye ingabe
35.Umunsi nganza ingoroji

Mukamutima kandi atawutunga
Mwibukira mu mibukiro
Kandi akikiye umuriro
Ni urutaza Rugemintwaza
40.Yamuragije iyo mu mbere

Hazira akarasisi k'imbeba.
Ihhii ndahakanye
Sayinzoga ni inzangano ze
Siwe nkindi
45.Yo gukenyeza inkera

Ngo ujye iyo uharare
Ngo wasize umuhozi.
Impundu z'ubu ni impuha
Ni impumbya ni impuha.
50.Ntasabye gakondo kunkosha

Iyi nganzo
Yenda ingarike
Sinyitura mu rugera
Ahari ejo rwagereka!
55.Sinyitura mu mataga!

Amatage n'imitaga
Nta banga
Yewe nta n'ibango
Mbyantaba mu nama
60.Nkabura nuwo kunyunamira.

Sindi bugiture
Nitangiriye itama
Nubwo ndora udutumbi
Ndataraka nka Nkona
65.Umunsi acisha Munana umutwe,

Amuziza ko ari umutwa
Kandi we ari umutwa
Byongeye w'umutwarasibo.
Munana yacunguye impinga
70.Benewabo bamuhaye impundu

Impinduramatwara yiyo
izihindura impuha
Apfa ahirita
Atanahembewe ibyo yahiririkaniye
75.Ngo yenda apfe bupfura.

Sindi bugiture nk'inkuru
Itaba mbi
Cyangwa ikaba mbarirano
Baba bambonye
80.Bene Mbonera

Bambamba mukambura.
Ni ngombwa 

Bagore b'amagaju
Mwubure ibisabo
85.Mwongere mwicundire

Ubakora ntimukome
Mushake inkanda
Mushyire nzira
Ndabasanga mu Rukari
90.Ubakora ntimukome!

Mwambare impumbya
Maze mukomeze,
Ndazana umutana
Ndawutereka aho
95.Nzakuramo rya cumu muhozi

Rizagenda rihorera
Niryahuranya mwamba
Kanagazi azaba aka Makumi
Asigare yambaza Imana z"ahandi
100.Yambare ubucabari aciririke.

Ese umuvubyi yavuye mbahe?

Ko nahoze mbanza urugamba

Kuva mu bugimbi

Ngacyura iminyago

105.Ubwo aho nanjye ndajwa?

None Minyaruko

Uriya wa Nyamikenke

Ko yari umuvubyi

Yamvumira kugahera

110.Neza ngapfa ntarinze?

Ese nemere karande kanjye

Kazimire burundu

Umutero uvangwe

Uvangavangwe n’umusururu

115.Ingoma nganzo yime rushorera?

Aho naba nasaze

Nemere inganzo

Izime burundu

Izime nka Rukurura

120.Irya y’Igisaka.

Nemere nte itushe

Ryarandemye nkiri umutavu?

Ese nibamburire mu mbuga

Ntonganye Mutimura

125.Mubaze ibya shebuja

Kandi nawe ari umurenzamase

Ese mpindure indaro

Ndorongotane mumbure

Ko ndambiwe kuba Kinigamazi

130.Kwa Kinigabantu!!!

Ese ntinyuke

nsabe umuceeri

ngo mpe mama asome

ariya macunda

135.yacunzwe n’umuja

wazonzwe n’umujinya

akimika umujogonyoko?

Yemwe bavuzi mwabivumbye

Namwe bavurwa mwarurumbye

Muhindure imbyino

Cyangwa mwicurire inkota

Mwiyice bitarabacanga

Kuko I Mahanga

Saho gukura umudende

Intwari zaratanze,

Zabuze abambarampumbya

Kuko Bene Karenzi

Nabo kwa Gakuba

Impumbya zabo ni impuha

Bahiye kimari.

Nimutikure kare

Mwirindira ubwire

Ubwomanzi bw’abiyo

Busumbya itako kalisimbi

Bisoke ni umutavu.

Impumbya z’impuha

Zampebeje Imana

Zintukisha imandwa

Zizatuma aho bukera

Nzaragura aka Nkoma wa Nkondogoro

Yewe Murindwasazi

Sekuru na bisoke

Abo bagore bawe

Bigize ingare

Bataye inkanda

Bakambara ubwambarabasazi

Ubasure mu bisubiremo

Bitabaye ibyo

Bazifashe ingoyi

Umunsi bagizwe ingoroji

Umunsi ibihunyira

Byatangiye kubacurangira

Bazibuka umuhanano.

Impumbya z’impuha

Zambitse Buhinja Ikamba

Harya mu kwa Semikore

Hafi y’ibiturika

Bararuza ingirwa nkanda

Bayimuhisha hafi y’ukuri

Ngo baramurinda abatengatanda

Bamwe bikwije

Impinga z’impugu zose

Ahubwo ari ukumuroha

Hamwe munyenga

Ngo agereyo yenyegeze

Ngo bamusabe kwikura ikoti

Rimwe ryazananye n’umuziha

Nabyaga atahe nk’uturotse

Inkuru ye

Tubure n’akanunu

Impumbya z’impuha

Zirarana ibyansi

Zikabipfumbata bupfapfa

Kandi amashyo amagana

Y’imbyeyi yararanyije.

Impumbya z’impuha

Zigisha gukama

Intoki zatobye amase

Ntizikoze amazi

Ngo zikiranuke n’isayo.

Numva uwangira

 shebuja wa muntu

natangatangira mu Nkomate

Nkungu na Bihembe

Bitararema inkomati

Mukankuru arebera

Numva uwangira

Shebuja wa muntu

Numva nasiba

Ibikorwa nta mikoro

Nkagabanya amakoro

Ngahemba Sayinzoga

Imirimo agakira imiruho

Aho yenda

Yareka kwivuruguta

Mu kuvumba inkorano

Uwangira Shebuja w’inganzo

Nahimba ibihwitse

Byuzuye igitsure

Kubambaye impumbya macuri

Bagacunaguza ibyanzu,ikobyo n’impakanizi.

Uwangira shebuja w’Imanza

Nakwimura Semanza

Ngahana bariya Bahinza

Ngaca urubanza rubanguka

Aho gutinda mu gatobero.

Uwampa aho ndaguza

Nifatiye impinga

Nkabona neza

Impamvu Mukaruyumbu

Na ba bagore bose

B’ibishongore

Ari nta mumaro

Bambaye impumbya z’impuha

Bahora bahiririkanira

Urwango rwinshi

Ngo bazabone urwunguko

Muri bene ingo zabo

Batabariye urwabo.

Impuruza zihamagara impumyi

Izo zizabura impundu

Nyir’indamutsa ndabarahiye.

Yemwe bahongwamariza

Iri sanzure ni indyarya

Ryakubeshya indeshyo

Ukavaho ureka ibigukuza

Ugasanga ibigukenkeza

Uruhu rw’ihene

Ntunambarire impumbya

Abakuvugirije induru

Ukaba nkaya ngata imennye

Itarabaye ingata

Ntibe n’urukoma

Impumbya zawe

Zikitwa impuha

Nkazambyaro za Mukakarangwa.

UMUSIZI TUYISENGE OLIVIER.