Impumbya z'impuha.

Umuvugo: Impumbya z'impuha

Reka nzure inzira
Nziture ya nzoga
Mpange iyi mpakanizi
Indaza ibigunda
5.Mu bigunira nigunze.

Hambere mbizi
Tukiri imbumbe
Imbamutima zigitinya gutinya
Mukabutindi Tunuri
10.Agitangatangiye I rutunga.

Musaniwabo uriya
Abisi b'ibisunzu
Bise nyamusa n'inyange
Bakamushuka ubushongore
15.Bakamukiza agikikiwe

Kandi abatwaye imisozi
Gacu naza Rwabicuma.
Bakimwa n'igicuma
Bakabaciririkanya nk'igiciro
20.Bagahemba amagufa n'umufa

Woshye impigi
Nazo zitari impinirakure.
Impumbya z'impuha
Nizambawe n'impigi
25.Ngo zirongore Kabare

Kandi no ku bwa Kalinda
Zarabanje kubunda ibigunda
Impundu z'impuha
Nizo batumye i Bugibwa
30.Zihasanze ubwandu

Ziyoboka bwangu
Impundu z'impuha
Nta Rusimbi ni urusimba.
Inganzo yambereye ingabe
35.Umunsi nganza ingoroji

Mukamutima kandi atawutunga
Mwibukira mu mibukiro
Kandi akikiye umuriro
Ni urutaza Rugemintwaza
40.Yamuragije iyo mu mbere

Hazira akarasisi k'imbeba.
Ihhii ndahakanye
Sayinzoga ni inzangano ze
Siwe nkindi
45.Yo gukenyeza inkera

Ngo ujye iyo uharare
Ngo wasize umuhozi.
Impundu z'ubu ni impuha
Ni impumbya ni impuha.
50.Ntasabye gakondo kunkosha

Iyi nganzo
Yenda ingarike
Sinyitura mu rugera
Ahari ejo rwagereka!
55.Sinyitura mu mataga!

Amatage n'imitaga
Nta banga
Yewe nta n'ibango
Mbyantaba mu nama
60.Nkabura nuwo kunyunamira.

Sindi bugiture
Nitangiriye itama
Nubwo ndora udutumbi
Ndataraka nka Nkona
65.Umunsi acisha Munana umutwe,

Amuziza ko ari umutwa
Kandi we ari umutwa
Byongeye w'umutwarasibo.
Munana yacunguye impinga
70.Benewabo bamuhaye impundu

Impinduramatwara yiyo
izihindura impuha
Apfa ahirita
Atanahembewe ibyo yahiririkaniye
75.Ngo yenda apfe bupfura.

Sindi bugiture nk'inkuru
Itaba mbi
Cyangwa ikaba mbarirano
Baba bambonye
80.Bene Mbonera

Bambamba mukambura.
Ni ngombwa 

Bagore b'amagaju
Mwubure ibisabo
85.Mwongere mwicundire

Ubakora ntimukome
Mushake inkanda
Mushyire nzira
Ndabasanga mu Rukari
90.Ubakora ntimukome!

Mwambare impumbya
Maze mukomeze,
Ndazana umutana
Ndawutereka aho
95.Nzakuramo rya cumu muhozi

Rizagenda rihorera
Niryahuranya mwamba
Kanagazi azaba aka Makumi
Asigare yambaza Imana z"ahandi
100.Yambare ubucabari aciririke.

Ese umuvubyi yavuye mbahe?

Ko nahoze mbanza urugamba

Kuva mu bugimbi

Ngacyura iminyago

105.Ubwo aho nanjye ndajwa?

None Minyaruko

Uriya wa Nyamikenke

Ko yari umuvubyi

Yamvumira kugahera

110.Neza ngapfa ntarinze?

Ese nemere karande kanjye

Kazimire burundu

Umutero uvangwe

Uvangavangwe n’umusururu

115.Ingoma nganzo yime rushorera?

Aho naba nasaze

Nemere inganzo

Izime burundu

Izime nka Rukurura

120.Irya y’Igisaka.

Nemere nte itushe

Ryarandemye nkiri umutavu?

Ese nibamburire mu mbuga

Ntonganye Mutimura

125.Mubaze ibya shebuja

Kandi nawe ari umurenzamase

Ese mpindure indaro

Ndorongotane mumbure

Ko ndambiwe kuba Kinigamazi

130.Kwa Kinigabantu!!!

Ese ntinyuke

nsabe umuceeri

ngo mpe mama asome

ariya macunda

135.yacunzwe n’umuja

wazonzwe n’umujinya

akimika umujogonyoko?

Yemwe bavuzi mwabivumbye

Namwe bavurwa mwarurumbye

Muhindure imbyino

Cyangwa mwicurire inkota

Mwiyice bitarabacanga

Kuko I Mahanga

Saho gukura umudende

Intwari zaratanze,

Zabuze abambarampumbya

Kuko Bene Karenzi

Nabo kwa Gakuba

Impumbya zabo ni impuha

Bahiye kimari.

Nimutikure kare

Mwirindira ubwire

Ubwomanzi bw’abiyo

Busumbya itako kalisimbi

Bisoke ni umutavu.

Impumbya z’impuha

Zampebeje Imana

Zintukisha imandwa

Zizatuma aho bukera

Nzaragura aka Nkoma wa Nkondogoro

Yewe Murindwasazi

Sekuru na bisoke

Abo bagore bawe

Bigize ingare

Bataye inkanda

Bakambara ubwambarabasazi

Ubasure mu bisubiremo

Bitabaye ibyo

Bazifashe ingoyi

Umunsi bagizwe ingoroji

Umunsi ibihunyira

Byatangiye kubacurangira

Bazibuka umuhanano.

Impumbya z’impuha

Zambitse Buhinja Ikamba

Harya mu kwa Semikore

Hafi y’ibiturika

Bararuza ingirwa nkanda

Bayimuhisha hafi y’ukuri

Ngo baramurinda abatengatanda

Bamwe bikwije

Impinga z’impugu zose

Ahubwo ari ukumuroha

Hamwe munyenga

Ngo agereyo yenyegeze

Ngo bamusabe kwikura ikoti

Rimwe ryazananye n’umuziha

Nabyaga atahe nk’uturotse

Inkuru ye

Tubure n’akanunu

Impumbya z’impuha

Zirarana ibyansi

Zikabipfumbata bupfapfa

Kandi amashyo amagana

Y’imbyeyi yararanyije.

Impumbya z’impuha

Zigisha gukama

Intoki zatobye amase

Ntizikoze amazi

Ngo zikiranuke n’isayo.

Numva uwangira

 shebuja wa muntu

natangatangira mu Nkomate

Nkungu na Bihembe

Bitararema inkomati

Mukankuru arebera

Numva uwangira

Shebuja wa muntu

Numva nasiba

Ibikorwa nta mikoro

Nkagabanya amakoro

Ngahemba Sayinzoga

Imirimo agakira imiruho

Aho yenda

Yareka kwivuruguta

Mu kuvumba inkorano

Uwangira Shebuja w’inganzo

Nahimba ibihwitse

Byuzuye igitsure

Kubambaye impumbya macuri

Bagacunaguza ibyanzu,ikobyo n’impakanizi.

Uwangira shebuja w’Imanza

Nakwimura Semanza

Ngahana bariya Bahinza

Ngaca urubanza rubanguka

Aho gutinda mu gatobero.

Uwampa aho ndaguza

Nifatiye impinga

Nkabona neza

Impamvu Mukaruyumbu

Na ba bagore bose

B’ibishongore

Ari nta mumaro

Bambaye impumbya z’impuha

Bahora bahiririkanira

Urwango rwinshi

Ngo bazabone urwunguko

Muri bene ingo zabo

Batabariye urwabo.

Impuruza zihamagara impumyi

Izo zizabura impundu

Nyir’indamutsa ndabarahiye.

Yemwe bahongwamariza

Iri sanzure ni indyarya

Ryakubeshya indeshyo

Ukavaho ureka ibigukuza

Ugasanga ibigukenkeza

Uruhu rw’ihene

Ntunambarire impumbya

Abakuvugirije induru

Ukaba nkaya ngata imennye

Itarabaye ingata

Ntibe n’urukoma

Impumbya zawe

Zikitwa impuha

Nkazambyaro za Mukakarangwa.

UMUSIZI TUYISENGE OLIVIER.

               

Nk'ubu mfuye?

Umuvugo: Nk'ubu mfuye?

Bagore b'ibishongore

Bahungu b'ingangare

Ndyarya turyana,

Ndaya ndaza

5.Mwisakuza ndabaza.

Aha twita mu kwacu

Ni iwacu?

Cyangwa ni kwa Rucumu

Nadacururuka azaturuka

10. Acunaguze amaheru?

Nkoramutima nkunda

Namwe nkumi munkura

Nk'ubu mfuye

Ubutumwa bugufi

15.Bwaza bwangu

Mukarara murira

Abandi baririmba

Bitegura guhamba

Dore ko kuri mwe

20.Hashyingurwa indashyikirwa!!!

Ese nkubu mfuye?

Mwaterateranya ay'igitambaro

Mukamvugira neza ku mva?

Mukavuga ibyiza ntakoze?

25.Mukavuga ibyaha ntigeze?

Mbe mukobwa nakunze

Nkanagukwa ugatuma mpakwa

Imbere mu mbere

Umburira agaciro

30.Nagukora ukanyikiza

Ba Rubebe

Bagira ngo tsee

Bakwitsamura ugatsimbuka

Ukabereka iwabo w'abantu

35.Bakagushimira ubwo buntu

Ngo n'ukuntu

Hari ukuntu

Ubereka ubumuntu bakakoga buzi

Ngo burya

Mukugobora ya soko nsango

40.Uhatse Muhazi?

Ibyo njye

mbyumva mu mihigo

Gusa simfite ubwoba

Mpagaze nemye

45.Ahari urwo unkunda ni boroke

Uzarunkunda rwarabaye rwinshi

Ese nk'ubu mfuye?

Ntiwakwipfusha gipfapfa

Ugakoresha amafoto?

50.Ugakwirakwiza mu bakunoza

Mukaza mukikiriza?

Ese nk'ubu mfuye?

Ntiwajya Ku karubanda

Ukandirimba undata?

55.Ese nkubu mfuye?

Ntiwagura imbaho

Izi ribuyu

Ngo bambarize uburyamo

Bumwe buryana

60.Buhora buryamye

Butagira inshuti?

Ese nk'ubu mfuye

Ntiwagura imibavu

Ngo untere mu mbavu

65.Nkaho iyo minyagwa

Yasibanganya inkovu?

Nkiri muzima

Wanyimye inyugamo

Wanyimye inyegamo

70.Wankoreye urugomo

Wanyambitse inkomo

Wanyimye n'urwagwa

Wanyambitse urubwa

Mu rwawe rugo

75.Ndutwa na nyakabwana

Ndi bugufi kwica na bwaki

Gusa nkubu mfuye

Urwamo rwaba rwose

Ugaca ibikuba

80.Ngo uhuye n'amakuba!

Ukiyambura imikaba

Abatakuzi imitima igahaba

Bagahiririkana barwana

Barwana no kuguhoza

85.Ngo ubuze uwo wihebeye

Kandi ubuze uwo watsikamiye.

Iyi intimba

 iyi imbabaza

Iyi imbase

 90.ikambuza guhumiriza

Yaransanze izansebya

Izantsibura yo gatsindwa

Sinzi icyo insurira

Gusa ifite imvano

95.Ahari nicyo gituma

Imvuna ntimveho

Indongora ntincyure?

Ikandimbura indi imbere

Bijya gutangira

100.Natekereje ku gatimba

Ngiye kuri komine

Mpatanga ituro

Mpata itungo

Ngiye kwa padiri

105.Mbura aya divayi

Ibya rya dini ryanjye

Biba nk'idingidi

Nyamukobwa yitahira uko!

Kandi nkubu mfuye

110.Za missa zose bazisibya

Mayibobo bagakarabya

Ibyaha bakabyihana

Bakarya umubiri wa Kirisitu

Nako ni uwanjye

115.Kuko ni njye

Waba ubahuruje mbakarabije

Ngo baze banjijishe.

Nako bajijishe intumbi

Kuko njye

120.Nabatahuye bugicya.

Ese nk'ubu mfuye?

Ibiseke byo Ku rusengero

Byasendera bigasaba amaturo?

Cyangwa byajumarirwa

125.Aka mukobwa wa Sharangabo

Bicikwa n'umwuma?

Kandi nk'ubu mfuye

Inyandiko zose nandikaga

Zagurwa kurenza urwagwa

130.Imbuga nkoranyambaga

Amafoto agacicikana

Woshye umwicanyi!

Ese nkubu mfuye

Urwengero rw'ino

135.Rwazituma Ngororero?

Bakabaga bihogo

Bakayigabagabana woshye

Rayon yatsinze APR!!

Nk'ubu mfuye

140.Ibimonyo n'ibishorobwa

Byacinya akadiho

Ndetse bikanaceza

Kuko amasaziro yanjye

Niyo mariro yabyo.

145.Kandi nkubu mfuye

Abacuruzi b'amasanduka

Ibyishimo byabasaba

Bagatera aleluya

Kuko uwiteka

150.Yaba agoboye igaburo.

Nkubu mfuye

Abakozi b'irimbi

Baririmba bahimbaza

Benewacu nabo

155.Bakarira bandirira.

Nkubu mfuye

Ya myenda yose

Imwe Ndamiye Andimo

Ninde yayiriha?

160.Ese nk'ubu mfuye?

Ko nta n'ikiruri

Ngira inaha

Ngo yenda bakigurisha

Imyenda ndimo banki

165.Ninde wayiriha?

Cyangwa nabo

Bateza cyamunara

Umuhungu wanjye muhahano?

Ese nk'ubu mfuye

170.Bamwe banyise imbwa

Imbwebwe nyakabwana

Ese ubwo baza kumpamba?

Oya byakwita guhamba Imbwa

Kandi ni ugukora ubusa!!!

175.Ese nk'ubu mfuye

Nanjyanwa i Rusororo

Ni i Nyamirambo se?

Cyangwa najyanwa i Nduba

Nk'indi myanda yose?

180.Cyangwa umurambo wanjye

Nawo Wahera

mu buruhikiro bw'ibitaro?

Watinda ugashyingurwa n'ibitaro

Nk'imwe njya numva baranga?

185.Ese nk'ubu mfuye

Ko ndora ndaha

Mu miruho

Nabuze amahaho

Ngo ngere ku ngingo

190.Nibura mfindafinde

Uwo dusa!

Ese nk'ubu mfuye

Bampambana ikara

Cyangwa ni Gaze?

195.Ko numva aribyo byateye?

Ese nkubu mfuye

Naba inkuru nyamukuru

Ibinyamakuru bikanyandika?

Bikanyandikaho inkuru

200.Zuzuye amakabyankuru?

Kandi nk'ubu mfuye

Bakaroresha imipira

Bakandikaho ibisigo

Bimwe bisumbya

205.Ibya Nyakayonga uburyohe?

Woshye ari ukumponga.

Bakibagirwa ko umupfu atabona

Atabasha gusoma

Ubwo butumwa bumutaka.

210.Ese nk'ubu mfuye

Imihanda za Buganda

Ruhango na Ruhande

Kigali na Kigali Ngali

Imodoka zaba uruhuri

215.Woshye inama ikomeye yabaye!!

Ese nk'ubu mfuye

Amatangazo yo kubika

Bayandika bakayakwirakwiza

Ku maradiyo naza Tereviziyo?

220.Bagatumaho aba he n' aba he?

Ese nk'ubu mfuye

Barara ikiriyo

Mu gihe

 bagitegereje ko bucya

225.Igitiyo kigakora Akazi?

Ngasubira iya butaka

Aho naje nturuka?

Ese bacanga amakarita

Bagatanga bagakina?

230.Cyangwa Bose bafata ibitabo

Naya mateshwa

Amwe yose nanditse

Bakibuka kugenzura byose

Kimwe ku kindi

235.Ntakiri muzima?

Wabona nk'ubu mfuye

Abo nabonaga

Bamaze kunsiga

Bakwigora bakaza

240.Bakifatanya n'abandi kurira

Bakanaboraga cyane

Woshye bankundaga

Kandi nk'ubu mfuye

Ahari mu rugo

245.Imbangukiragutabara zahita zihagera

Aho gushyashyana bashyingura

Bagashyira nzira

Ngo bajye

Gupimisha umurambo

250.Bamenye icyawishe

Kabishywe umurambo

Basanze wishwe

N'ikintu kidakomeye

Uhabwa amahirwe ukazuka!!!

255.Ese nk'ubu mfuye?

Bene ijuru banyijujutira?

Bagata ikuzimu

Bene Rusenzi Rusuferi

Ngasanga ipanu ipanze

260.Ngo bankarange bindenge

Bantoze menyere

Inturo yanjye nihitiyemo!?

Cyangwa nk'ubu mfuye

Nasanga abacuranzi

265.Bo kwa nyagasani

Bamwe batari Kinga Bluez

Batari Kesho band

Batari ba bana bo ku Nyundo

Bambaye biteguye.

270.Bambariye gutarama?

Injyana nziza

Zigaherekezwa n'imivugo

Bakaririmba mu majwi yabo

Amwe meza

275.Atari aruto,atari baze cyangwa tenoro.?

Cyangwa nk'ubu mfuye

Nasanga abasore

Ba Rusuferi

Bashatse ibishari

280.Bakusanyije ubuhiri

Ngo bandyoze inshuro

Natokesheje shebuja

 shitani uwo

Ese nk'ubu mfuye

285.Ku munsi w'urubanza

Mbaye arinjye ubanza

Nabona umwunganizi

Cyangwa byahwana

Nkaruma gihwa?

290.Habe no kujurira

Ifungwa ry'agateganyo

Nkaba nka Rubebe Noseni uriya?

Mana mfuye ubu

Byaba bipfuye

295.Imishinga yanjye yose

Yashonga ikanashirira

Nashinyagurirwa nkanashahurwa

Ngaho nguriza iminsi

Nguhaye iyi nganzo

300.Uyigire ingwate

Igihe nikigera

Rwose uzayisubize

Gusa amasezerano nyasinyeho

Nindambirwa iyi si

305.Sinzakubwira uzabyibwira

Nubona nsabye penetensiya

Ngakorerwa ugusigwa kw'abarwayi

Nkiyegereza kiriziya

Ushatse uzaze unjyane

310.Hahandi iwawe

Kuko rutindi rupfusha uriya

Tuzirana kubi

Kuko mvuga

Buri kimwe cyose

315.Urumva ntitwashobokana.

Iby'uriya muriro we

Ndabizi kandi ndakuzi

Umunsi warakaye

Ikuzimu uzahagusha amahindu

320.Aho kuba ibishirira

Hahinduke igishanga

Maze cya shitani

Ukijyane kugifunga

Twongere kwiyunga

325.Mbone Shakuru afite ishapure

Na Ally aririmba aleluya

Ndabishaka mwami

Niba kandi mbirose nkangura

Umpe ibyo mvugurura

330.Kuko ibyo mvuga warabimpaye.

UMUSIZI TUYISENGE OLIVIER