Mukumbure mukure he?

Umuvugo:  mukumbure mukure he?

Iteka mu mateka
Buri muntu nyamuntu
Agira urukundo ni urukumbuzi
Akagira ibyiyumviro byinshi
5.Agakumbura hirya no hino.

ndicara ncecetse
Intimba ikantera
Ibyiyumviro bikantonganya
Bikambaza bikanserereza
10.Nkibaza nti mukumbure mukure he?

Ciraha kibondo
Ninde ukuvuze
Iyendere akabere
Ndabikunda nkomeje
15.Nkabikumbura nkabibura.

Rupfu wee!!
Nushaka utuze utunganirwe
Utere udatuza
Ningutera nzagutoteza
20.Nzagutuza ahadaturwa.

wigize urujyo
harya uri umujyojyo
uri mu murangangoma?
ndakambari ka matene.
25.nzagutikura ndi ikirura

iyo ngabe ngabirano
nzayigarika ntukore
wayiramvuye mu mvuzo
abiru ntituyizi imvano.
30.uri kinigamazi?

cyahe wa cyohe we!!
icyo uzi ni kimwe
n' ugutirura ibyo utatiye
ushimuta abashakamba
35.nshumbusha ndore

harya ngo ni nyamukobwa?
gakorwe n' isoni
wowe wa busa we
wansize nk'igisenzegeri
40.gasuhererwe nkanjye

uwansigasiye bidasanzwe
uwandiriye ikivu
uwo navunnye ambyara
agashinyiriza anshaka
45.ko wamwohohanye wampoye iki?

ko yankunze nkuko ndi?
Nkaba ndindiye uzanyondora?
niba kukwica bisaba indagu
iburagurabana nzagabana
nibisaba ibitega kwa kimenyi 50.nzahatura.

 dore nibuze
ninjye nyamwongera ikibi mu kindi? nikihe cyago kingize ntya
ndakangutse nkabakaba akabere 55.nsanga ni baringa

ngaho mungane
ahari akanjye kashobotse
ndi ku kandi karwa
akarwa k' Urwango
60.ahadacudika na cira nikubite.

Nyabuna mfura nziza
Niba ari ubusizi
Ndabasabye sinasaze nimunsigurire
Abasirimu munsobanurire
65.Naho ubundi mukumbure mukurehe?

Ndabona amarira
Nkabura umuhoza
Nkabona inyana
Nkabura imbyeyi
70.Inyanja nkabura ubwato.

nyamunsi nyagupfakara
mpfukamire nde?
Uwakampojeje ko yampunze
Uwakantetesheje ko yantaye
75.Ese mukumbure mukurehe?

hafi yiyi ntaho
hari Intimba ihora intimbura
yewe Ntu
yinture ntahe
80.irantimbura mu ntananya

ishavu ntirishira
riranshengura gaa ndashira
riramvuna ndavirirana
navuka sinakuvumbye
85.wavuye ino tutavunuye

Niko ngenzi
Ngendo nziza
Nanjye ngira ingingimira
Nubwo ngira urukumbuzi
90.Ubu umbona sinkuzi isura.

Ntekereje ko ntekanye
Nziko ntuje
Bucura nawe ati
Arihe nyabusa nyogokuru
95.ngo anyereke inyegamo

Nkaruca nkarumira.
Mukumbure mukurehe?
Uw’ indamutsa
Uw’imanzi n’amariza
Uw’abasaza ni abakecuru
100.Ingeri zose zimbaza?

Umubyeyi ukubyara
Umukunzi ugukunda
Nubakumbura ukababura
Uzicare utuze
105.Bari ijabiro kwa jambo.

Numuca iryera
uzamuhobera ubutarorera
Muzaseka bisesuye
gusa ubu isango ni
110. ''Mukumbure mukurehe?

Umunsi agutana itarano
Waratotejwe ubura ubuturo
umutima ukagutota
uti ko n'agataro
115.yagateruye ntagatinye?

yatabarutse ate?
byibura ntanatiye inyiturano?
kwigengesera,ibise
isesemi,gutora butungo
120.ibyago naguteje

urihe bambe ngo nguture igisigo?
Numvishe napfa
Bitari ubupfapfa
Igihe mba impfubyi
125.Nkipfurika nkimfumbata.

Nkirera nkireba
Nkibaza nkisubiza
Nkarira nkihoza
Ngaterwa nkitabara
130.Nkibaza nti mukumbure mukurehe?

Nkifuza cyane
Byinshi bidashoboka
Nti uwampa imana
Nkabona mama umbyara
135.Nkabona umukunzi nabuze.

mawe umbyara
wantaye utabishaka
ndagushima nshize amanga
amagambo ntiyabigaragaza
140.kereka ugarutse

wabona ugabiwe
amashyo amagana
byabiganza byawe
ngabire itaganda
145.bigaba amariza

byantongereye ineza
nzagaba amariza
sinagabanye amarira
amarembo aracyari magari
150.ataha inyambo

uwari uruhinja
acira inkonda
agaragurika ku byahi
yasokoje ibisage
155.yagushatse yahebye

mukumbure mukure he?
nyambibi nyanziza
nyamusaninyange nyabusa
akabura ntikaboneka
160.akapfa ntibaterekere?

reka nsayuke
ndakubuze bambe
ungirire imbabazi
nanjye sinjye
165.ni imbamutima zikumbaza.

UMUSIZI TUYISENGE OLIVIER