Wandoze Mu Ndagu!!

Umuvugo:    Wandoze mu ndagu

Iki ni igisigo

Si gaho songa

Wisanga igisasu

Kurugutura utuze

5.Uve mu ruvange.

Si uko imbali badiha

Injereri zaho suko ziduha

Mbaza ndasubiza

Utazasanga wisogose!

10. Ko ushyashyanana umushyo

Aho songa wakwisogota?

Amaturo nabya bitambo

Singututse wabiteye inyoni!

Wandoze mu ndagu

15.umusinga nari narenze akarwa.

Waramunze manzi

Nako mungu wee!!

Untsikamira udutsintsino

Ugeze mu gihumbi

20.Ntiwahuha urahuhura

Wandonze mu ndagu

Wamirishije nkeri

Urankikira ngo unkindure?

Data umwiba umuronko

25.Undasa akamironko

Wanteje akaga

Turi mu kanda

Akabi kabaye ku kana

Karya k’iwanjye

30.Wagakunze urumamo!

Uwagutumye gukosha

Igisabo keze ku mugina

Mu isambu y’umuswa

Ntagira inkomoko mbi arakanyagwa!!!

35.Watumwe ibitabaho

Witagaguza mbe nziza

Va mu bitabapfu

Yagupfunyikiye ikibiribiri

Ngo yishe umutware

40.Byahe ko ari baringa!!

Ibyo bagutsindikiye nk’intsinzi

Nibyo gahungu nitsiritse

Uko nitsamuye

Igitsure cyawe kigatsimbuka

45.wandoze mu ndagu.

Mama si nyirarubindankima.

Wankinduye naberanye

Unyima nanyazwe

Unzirika nubundi nzongwa

50.Ntunzindaze birya si nkana

Mukiryana havuyemo ikiryoha

Mukica havuye igicungura

Mu ndagu havuyemo indagano

Mu  bugome havuyemo ubugabo

55.Mu bwana havuye ubwanwa

Za ngoma zangoneraga

Zazindi zangomeraga

Dore ko atarukuvuga

Gaa!!! Zarashinyaguraga

60.Zirara zimvuga mu matwi

Nk’ibivumvuri

Isahaha yazo irasanzwe

Gusa ntigasure umusizi

Imusanza ubwonko

65.Agata ubwenge.

Uko nyiribishura

Yari yashimye

Ugasanga arabisubitse

Ibyawe arahagaritse

70.Ntube ukiri umutekererezangoma

Ukaba umutekererezanguma

Wandoze mu ndagu

Gusa byime amatwi

Tebuka dutarame

75.Nabaye nkaya nkuku mbisi

Yego ni ukuri

Kwambaye ukundi

Nari incike ndi agacagatanzira

Ubu ntitwacudika ndi agacumitajuru

80.Uwari  igicibwa

Acuditse n’abacunguwe

Aka si agahariro

Si ndahaga aka si agahayo

Burya umunsi untuma

85.Ka gahanya ka gahembe

Ngo kambere agahemburo

Agahinda  kabaye agahishyi

Naharwanye nk’inkunguzi

Nkubwire  yari inkundura!!

90.Wandoze mu ndagu

Ko najimije ukajunjama

Ko nakujoye ntujumarirwe

Aho nasayuka wabisobanura?

Ese wabijonjora?

95.Cyangwa urajundika injonjori?

Yemwe mfura mwe

Yemwe bagendajuru

Mumbwirire bene imboga mbi

Ko zanze gushira mu nkono

100.Zanze zidukubise inkubara

Utazi  akaraye ifundwe

Hambere abakuru

Barabikuzaga barabyubahaga

Akaraza ifu

105.None uwo mushinga

Usa nushaje warashengabaye

Wahawe akato

Nkaho ariwo gito

Kandi gito nuwo batazira

110.Nyir’igitinyiro

Witwikira amabara

Akabana n’amabandi

Iby’amabanga

Akabibitsa amabandi

115.Wandoze mu ndagu

Byinira ku rukoma

Gusa uribeshya ntirukomeye

Rwakaka wakwibura

Wamupfumu yaragupfunyikiye

120.Yo gapfusha

Intsinzi yawe

Ifite nkoma wa nkondogoro

Iyo mu marangara ya gitarama

Gusa ubu ni umutagatifu

125.Mu mudugudu w’abadahumeka

Ka nsubike

Gusa nkukosore

Mu mvugo giseseka

Hato udasobanura usobanya

130.Nkasanga nagosoreye mu rucaca

Icyo nagucagaho uhoraho iteka

N’ukwikuza ukanogereza

N’ugucunaguza twa bucura

Bucura bwawe

135.Yagusigiye ngo uzamusindagirize

Ese nkwibarize

Uzacunaguza na muraza

Umaraza wa mariza?

Iriya sura ko yagusura iteka?!!!!

140.Hindura intekerezo

Ureke kumarira

Amasambu mu busa

Ibyabapfu biribwa n’abapfumu

Ngaho baho bambe

145.Njye ntibyakunze

Ndi uwishwe bihishwe

Ndi uwashumitswe abandi bimitswe

Ndi uwapfumbatijwe imbuto

Ntagirirwe imbabazi

Gusa yarozwe baringa

150.Arogwa mu ndagu

Naraburenze gusa barandinze

Reka nsubike inganzo

Gasizi ndekere abandi

Nduhuke ndananiwe

155.Ibyawe nzaba numva

Umusizi Tuyisenge Olivier