Amarira Nkaya

Nguwo Mukarubega Rosine natuye icyo gisigo

Umuvugo: Amarira nkaya!!

Hari umunsi

Usumbya ububi icyaha!

Ugasumbya ububi icyasha!

Ugasumbya ububi icyena!!

5.Umunsi utera amarira nkaya

Hari umunsi w’icuraburindi

Ikirere kjimye

Ijuru ryijuse

Ijabo ryajumariwe

10.Ninayo nkomoko yiyi nkongi

Iyi inkwiriye uyu mubiri wose.

Ndoye hino

Nkarora hakuno

Mbura nyir’imisango

15.Ndasara ndasizora

Muvuga mu izina bidakwiye

Nti arihe Sekaganda Noseni?

Nti arihe Bazitete Adoziya?

Baramfata baramfubika

20.Nkibaza impamvu batari aha!

Ngo bafate impano

Bampere impamba n’impanuro

Umukobwa mwiza

Mukarubega Umukundwa

25.Azazibuke no mu busaza

Nuko nkiri muri ayo

Mbona Rubimburirangabo

Inkuba yesa

Arangannye aranganiriza

30.Ati witayanjwa batabarutse hambere.

Nkiri muri iyo

Numva ijwi ryiza

Risa nkirivugira kure

Mu bwami bw’ijuru

35.Riti “hafi yawe aho hari ibarwa

uyisome usubire

Untangire ubutumwa

Umbwirire Fifi

Ko twagiye tutamwanze

Bitakunze ko tugumana

40.Gusa urukumbuzi muri twe ruragurumana”.

Mukarubega maa!!

Uri umwete nitayeho

Dore wakuze wanakowe

Gusa urungano rwawe

45.Rurakurora rwakomerewe

Ruribaza ikibi cyaguteye

Kikagutera guhitamo

Kubata mu bitaramo

Ukaba wigendeye

50.Iyo batazi

Mbe maa!!!

Nyoko yari inyamibwa

Asa n’inyambo

Yashinyirije agushaka

55.Umuvuna uvuka

Nonese bambe!

Ko ndora wasaze wasizoye

Aho kwa nyina w’undi

Uzaharara ntuzirara

60.Ukibagirwa ko nyina wundi ataba nyoko?

Ese ibyivugo bya Gashumba

Musaza wawe

Umwe uberwa n’ibisage

Ntibikikunyura maa?

65.Wabigaramye wahakanye?

Ariko abana bubu yee!!

Nkubana Ngarambe uwo niwe ugukuye

Aho wavukiye

Ukahamenyera kuvuga?

70.Ukahivurugutira mu ivumbi!?

Aho ntunyurwa manuma maa?

Gusa wagenda wagira

Uzibuke rwa rwenya rw’ino

Unyaruke dutarame

75.Dore nubundi ugiye ntawe ugutumye

Umusaza ukubyara

Yampaye aka kabarwa

Reka ngasome

Nkureke nawe wisomere

80.Uwo waturushije twese.

Ndarora undora nabi

Utanantuka ndabona udaseka!

Gusa wifunga isura

Igitego cyawe sinagitutse

85.Nakari kandimo maa!!

Ya barwa ya So

Nayisomye nyisukamo amarira

Gusa reka nawe ngucire

Ku mayange.

90.Yateruye ati!!

"Hobe kana kanjye

Duherukana burya

Mu mirabyo n’inkuba

Mu marira n’imirambo

95.Mu gihugu kibi

Cyari cyuzuye ibizira

Ubuzima bw’abazima

Buzima buri joro n’amanywa!

Amata atagira gitereka!

100.Umututsi atagira gitura!!

Gusa bambe

Nurira ntumpore kuba gitera

Umpore ikibintera.

Nabonye ubutumwa

105.Bwuko wakuze wanakowe

Ibyishimbo biransaba

Gusa ishavu rwo gashira

Rirampubuza rimpamya mu gihumbi

Rinyibutsa ko ntahari

110.Ngo unyambike rya kamba

Gusa dore nyoko weee

Yarize yahogoye

Nahojeje yanze

Gusa arantumye ngo

115.Ka gaseke kamwe kakabaye ake

Ugahe uwo gakwiye

Gusa ahubwo we reka

Akwihere akakugomba

Nyoko yantumye ngo

Umugabo ni umugaba

120.Nagukora ntuzikanyaze

Dore yagukoye

Nagusaba ibisusa

Ntuzamuhe isogi

Nafunga isura

Uzahore uri nk’isugi

125.Imbere y’amaso ye!!

Uzamusasire ya sano mudasangiye

Umusegure ya nseko

Umurinde inzara n’inzingo

Azakubera inzozi nziza iteka

130.Nta marira nkaya

Uzamukinge icyibi

Umukurikize icyubahiro

Azakubera icyuzuzo

Kimwe kizakwizihira

135.Kugeza mu gusaza kwanyu

Kandi ngo yagusize nk’akanyange

Uramenye ntuzatege nk’akanyenzi

Ibya nyoko nibyo.

Gusa iyi baruwa yanjye

Reka nyisoze

140.Nsaba Ngarambe

Uwo muhungu

w’amasoso nk’aya Musinga

azamenyere igikobwa

agikunde agikomereho

145.akimenyere inkanda ikannye neza

Ngiyi inkomoko y’amarira nkaya.

Mbe Rosine

Rubibi rubereye ibirori

Nawe Ngarambe

150. ruhanga rubereye ibisage

Iwanyu hazazire ibizira

Guhangana bibe kirazira

Iwanyu amata azahore avuna imitozo

Kirazira gucunda murigata inzindaro

155.Kandi Mukarubega

Indoro izahore ariyo

Ujye ucunda

Nucutsa woze ibisabo

160.Niyo mitsindo y’igisebo

Kandi nkwifurije

Kuzahorana ibyona n’ibyonona

Inabi izanambe

Ubukungu busagambe

165..Muzabyare hungu na kobwa

Gusa Fifi

Uko uzajya uryama

Ujye wigaya wiganyire

Wibuke ko Uwantege Blandine,Uwicyeza Juliette

170. Na Kayitarire Violette

Bene nyoko

Bazagukumbura bikomeye

Amarira akabatemba ku maso

Kuko ntibagishoboye kukubuza

Kujya iw’abandi!

tuzagukumbura cyane

Ujye wibuka

Ko uwo musore uje ejo

Wamurutishije uwakurwajije

180.Akakurera ugakura

Ngaho Rosine

Baho bambe

Imbabazi zo ni ntazo

Gusa nkwifurije ishya n’ihirwe

Mu mirimo yawe mishya

185.Yo kurera no kurara wumva abarira.